Նախարարությունը հերքում է տեղահանվածների աջակցության դադարեցման լուրերը. ծրագրերն ընդլայնվում են

 Հայաստանի աշխատանքի և սոցիալական հարցերի նախարարությունը հերքել է Լեռնային Ղարաբաղից տեղահանված անձանց սոցիալական աջակցության դադարեցման մասին լուրերը՝ դրանք որակելով որպես քաղաքական ուժերի կողմից տարածվող միտումնավոր ապատեղեկատվություն: Գերատեսչության մամուլի խոսնակ Նվեր Կոստանյանը ֆեյսբուքյան իր էջում կատարած գրառմամբ պարզաբանել է, որ պետական օժանդակության ծրագրերը ոչ միայն չեն դադարեցվել, այլև ընդլայնվում են՝ ներառելով բնակապահովման, զբաղվածության և վարձակալության փոխհատուցման նոր նախաձեռնություններ:

Խոսնակը պարզաբանել է, որ բնակարանային ապահովման ծրագիրը, որն ունի շուրջ 2 մլրդ դոլարի բյուջե, հանդիսանում է ոլորտի ամենամասշտաբային նախաձեռնություններից մեկը և գործում է բնականոն հունով: Բացի այդ, շարունակվում է 30,000 դրամի աջակցության միջոցառումը, որից օգտվում է 44,000 անձ, իսկ հրատապ օգնության ծրագրի շրջանակում ընդգրկված է ևս 6,000 կարիքավոր ընտանիք: Կոստանյանը տեղեկացրել է նաև, որ առաջիկայում կմեկնարկեն վարձակալության երկարաժամկետ փոխհատուցման և ինքնազբաղվածության խթանմանն ուղղված նոր ծրագրեր, ինչը վկայում է պետական հոգածության հետևողականության մասին:

«Ղարաբաղից  տեղահանված շուրջ 25 000 անձ ներկայումս ունի ֆորմալ զբաղվածություն։

Առհասարակ սոցիալական խնդիրների և աղքատության հաղթահարման հարցում պետության քաղաքականությունը հստակ է․ ճանապարհը մեկն է՝ աշխատանքը։ Պետությունը խրախուսում է աշխատանքը՝ որպես կյանքի դժվարին իրավիճակից դուրս գալու հիմնական միջոց, և հետևողականորեն իրականացնում է քաղաքականություն, որն ուղղված է քաղաքացիների կայուն և երկարաժամկետ զբաղվածության ապահովմանը։                             

ԱՍՀ նախարարությունը տարբեր ձևաչափերով շարունակաբար հանդիպումներ է ունենում Ղարաբաղի մեր հայրենակիցների հետ, լիարժեք տեղեկացված է նրանց հուզող խնդիրներից, իսկ պետության կողմից  իրականացվող քաղաքականությունները մշակվում են՝ նաև հաշվի առնելով հայրենակիցների կարիքներն ու դիտարկումները»,- գրել է Կոստանյանը։