Civilnet
Ամերիկայի Միացյալ Նահանգների փոխնախագահ Ջեյ Դի Վենսը տիկնոջ՝ Ուշա Վենսի հետ փետրվարի 9-10-ին պաշտոնական այցով կժամանի Հայաստանի Հանրապետություն։ Այս մասին հայտնում են Հայաստանի կառավարության մամուլի ծառայությունից։
Նշվում է, որ այսօր երեկոյան տեղի կունենա ՀՀ վարչապետ Նիկոլ Փաշինյանի հանդիպումը ԱՄՆ փոխնախագահի հետ, որից հետո նրանք հանդես կգան հայտարարություններով:
ԱՄՆ Պետդեպարտամենտից հայտնել են, որ Վենսը կայցելի նաև Ադրբեջան։
Պետդեպարտամենտի հաղորդագրության մեջ նշվում է, որ Հայաստան և Ադրբեջան կատարած այցերի նպատակն է առաջ մղել նախագահ Թրամփի խաղաղության ջանքերը և խթանել «Միջազգային խաղաղության և բարօրության Թրամփի ուղին» (TRIPP) նախաձեռնությունը։
Ավելի վաղ ԱՄՆ նախագահ Դոնալդ Թրամփն անդրադառնալով փոխնախագահ Վենսի տարածաշրջանային այցին՝ սոցիալական իր էջերում գրել էր․ «Մենք կուժեղացնենք մեր ռազմավարական գործընկերությունը Ադրբեջանի հետ, Հայաստանի հետ կստորագրենք խաղաղ նպատակներով միջուկային համագործակցության գեղեցիկ համաձայնագիր, կկնքենք գործարքներ մեր հիանալի կիսահաղորդչային արտադրողների համար, ինչպես նաև Ադրբեջանին կվաճառենք ԱՄՆ-ում արտադրված պաշտպանական սարքավորումներ՝ ներառյալ զրահաբաճկոններ, նավակներ և այլ միջոցներ»։
Հայաստանի արտաքին գործերի փոխնախարար Վահան Կոստանյանն էլ հայտնել է, որ ԱՄՆ փոխնախագահի այցի ընթացքում կլինեն զարգացումներ, որոնք էլ ավելի կխորացնեն Վաշինգտոնի հետ հարաբերությունները՝ թույլ տալով համագործակցության նոր ոլորտներ բացահայտել:
Պատմություններ
