Civilnet
Ռուսաստանի շահերին վնասելը չի եղել, չկա և չի լինելու մեր օրակարգում, որևէ մեկը մեզ չի կարող ներքաշել Ռուսաստանի դեմ գործելու տրամաբանության մեջ: Այս մասին Հանրային հեռուստաընկերության եթերում ասել է վարչապետ Նիկոլ Փաշինյանը՝ անդրադառնալով Ռուսաստանի հետ հարաբերություններին։
«Մենք բոլոր տեղերում, մեր բոլոր գործընկերների հետ կիսում ենք հետևյալ միտքը, որ Ռուսաստանի շահերին վնասելը չի եղել, չկա և չի լինելու մեր օրակարգում, դա բացառված է, որևէ մեկը մեզ չի կարող, եթե նույնիսկ փորձի, մինչև հիմա փորձեր չեն էլ արել, բայց որևէ մեկը մեզ չի կարող ներքաշել Ռուսաստանի դեմ գործելու տրամաբանության մեջ։ Եվ նաև մենք ռուսաստանցի մեր գործընկերներին ենք ասում՝ գիտեք՝ մենք չենք կռվելու ձեզ հետ, մենք չենք վիճելու ձեզ հետ, մենք ձեզ հետ լեզվակռվի մեջ չենք մտնելու, որովհետև մենք գնահատում ենք այն հարաբերությունները, որը մենք ունենք»,- ասել է Փաշինյանը։
Ըստ վարչապետի՝ անձնական հարաբերությունների մակարդակը նույնպես պակաս կարևոր չէ այս կոնտեքստում: Փաշինյանը վստահեցրել է, որ ինքը շատ ջերմ և ուղիղ հարաբերություններ ունի Ռուսաստանի նախագահ Վլադիմիր Պուտինի և վարչապետ Միխայել Միշուստինի հետ:
«Սա մեր ռազմավարությունն է, մենք չենք գործելու Ռուսաստանի դեմ, բայց մենք միշտ գործելու ենք հանուն Հայաստանի Հանրապետության շահի»,- ասել է Փաշինյանը։
Անդրադառնալով օգոստոսի 8-ին Վաշինգտոնում ստորագրված փաստաթղթին և դրանից հետո ռուսաստանցի գործընկերների շրջանում առաջացած հարցերին՝ Փաշինյանը նշել է, որ հայկական կողմը պատրաստակամ է բաց խոսակցության։ Ըստ վարչապետի՝ Վաշինգտոնում ստորագրվել է մի բովանդակություն, որը նախկինում առաջարկվել էր հենց Ռուսաստանի Դաշնությանը։
«Մենք հինգ բառ ենք ուզել ընդամենը. այդ բառերն են՝ տարածքային ամբողջականություն, ինքնիշխանություն, իրավազորություն, փոխադարձություն, սահմանների անխախտելիություն։ Մենք ասել ենք՝ դրեք այս հինգ բառը թղթի մեջ և ես ցանկացած պահի պատրաստ եմ այդ թուղթը ստորագրել»,- ասել է Փաշինյանը։
Պատմություններ
