Իսրայելում ԱՄՆ դեսպանատունը հայտնել է, որ ի վիճակի չէ աջակցել իր քաղաքացիների տարհանմանը

Երուսաղեմում ԱՄՆ դեսպանատունը պաշտոնապես տեղեկացրել է իր քաղաքացիներին, որ ներկայումս ի վիճակի չէ աջակցել Իսրայելից նրանց տարհանման գործընթացին։ Այս մասին հայտնում է AlJazeera-ն։

Առցանց հրապարակված անվտանգության հաղորդագրության մեջ դեսպանատունը հայտնել է, որ Իսրայելի զբոսաշրջության նախարարությունը հատուկ ավտոբուսներ է գործարկում դեպի Եգիպտոսի սահմանին գտնվող Տաբա անցակետ, սակայն հստակ զգուշացրել է, որ այդ տարբերակից օգտվելու դեպքում ԱՄՆ կառավարությունը չի կարող երաշխավորել քաղաքացիների անվտանգությունը։ 

Դեսպանատունը շեշտել է, որ այս տեղեկատվությունը տրամադրվում է սոսկ որպես օժանդակություն նրանց համար, ովքեր ցանկանում են լքել երկիրը սեփական պատասխանատվությամբ։ 

Եգիպտոսի սահման մեկնող ավտոբուսներից օգտվելու համար ԱՄՆ քաղաքացիները պետք է նախապես գրանցվեն Իսրայելի զբոսաշրջության նախարարության կողմից տրամադրված հատուկ տարհանման ձևաթղթի միջոցով։

***

Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Մերձավոր Արևելքի երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին։ Իսրայելը հարվածում է նաև Լիբանանին։

ԱՄՆ նախագահ Դոնալդ Թրամփը մարտի 2-ին հայտարարել է, որ Իրանի դեմ իրականցվող հարվածների առավել ինտենսիվ փուլը դեռևս չի մեկնարկել, այն շուտով է լինելու։