Թուրքիայի տարածքում իրանական բալիստիկ հրթիռ է չեզոքացվել․ Անկարան Թեհրանին զգուշացրել է

Իրանից արձակված բալիստիկ հրթիռը, որը Իրաքի և Սիրիայի օդային տարածքով շարժվում էր դեպի Թուրքիա, չեզոքացվել է Միջերկրական ծովի արևելքում տեղակայված ՆԱՏՕ-ի հակաօդային պաշտպանության համակարգերի կողմից։ Այս մասին հայտնում է CNN Turk-ը։

Նշվում է, որ Հաթայ նահանգի Դյորթյոլ շրջանում ընկած բեկորները պատկանում են թիրախը խոցած զինամթերքին. միջադեպի հետևանքով զոհեր կամ վիրավորներ չկան։ 

Թուրքիայի ԱԳ նախարար Հաքան Ֆիդանը մարտի 4-ին հեռախոսազրույց է ունեցել Իրանի արտաքին գործերի նախարար Աբբաս Արաղչիի հետ և փոխանցել երկրի պաշտոնական արձագանքը՝ կոչ անելով զերծ մնալ հակամարտության ընդլայնմանը նպաստող քայլերից։ 

Թուրքական կողմը հայտարարել է, որ պատրաստ է վճռականորեն պաշտպանել իր սահմանները և շարունակում է խորհրդակցությունները ՆԱՏՕ-ի դաշնակիցների հետ։

Թուրքիայի Հաղորդակցության տնօրեն Բուրհանեթթին Դուրանն իր հերթին հայտարարել է․

«Մեր երկրի և սիրելի ազգի անվտանգությունն ապահովելու մեր վճռականությունն ու կարողությունը գտնվում են ամենաբարձր մակարդակի վրա: Մեր տարածքն ու օդային տարածքը պաշտպանելու համար անհրաժեշտ բոլոր քայլերը կձեռնարկվեն առանց վարանելու: Ցանկացած թշնամական գործողություն կստանա անհրաժեշտ պատասխան՝ միջազգային իրավունքի շրջանակներում»:

***

Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Պարսից Ծոցի Արաբական երկրներին երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին։ Իսրայելը հարվածում է նաև Լիբանանին։