Սամվել Կարապետյանի աջակից երեք անձ ձերբակալվել են դատարանի բակից

Սամվել Կարապետյանի աջակից երեք անձ ձերբակալվել է։ Այս մասին ՍիվիլՆեթին հայտնեցին Ներքին գործերի նախարարությունից։

Մարտի 13-ին՝ ժամը 15։30-ից Հակակոռուպցիոն դատարանի առջև ի աջակցություն Սամվել Կարապետյանի բազմաթիվ մարդիկ են հավաքվել։ Դատարանը քննում է Սամվել Կարապետյանի խափանման միջոց տնային կալանքը երկարաձգելու հարցը։ Տարածքում կային մեծ թվով ոստիկաններ։

Դատարանի բակից ոստիկանները բերման են ենթարկել որոշ աջակիցների։ 3 անձ Վարչական իրավախախտումների վերաբերյալ օրենսգրքի՝ ոստիկանի օրինական պահանջը չկատարելու հոդվածով ձերբակալվել և տեղափոխվել են ՆԳՆ ոստիկանության տարածքային ստորաբաժանում։

2025-ի հունիսի 17-ին Սամվել Կարապետյանի տանը խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն: Նա կալանավորվեց հունիսի 18-ին։ Դեկտեմբերի 30-ին դատարանը փոխեց գործարարի խափանման միջոցը, և կալանքը փոխարինվեց գրավով ու տնային կալանքով։