Փետրվարի 18-ի ընտրությունների արդյունքները վիճարկելու հայցով «Ժառանգության» առաջնորդի հայցը Սահմանադրական դատարան և տարբեր քաղաքական ուժերի հետ խորհրդակցությունների շարքը ակնհայտորեննյարդայնացնում է իշխանություններին:
Միամտություն կլինի ենթադրել, որ Սահմանադրական դատարանը կարող է այնպիսի որոշում կայացնել, որը բարդ իրավիճակի մեջ կդնի Սերժ Սարգսյանին: Սակայն մյուս կողմից ընտրությունների արդյունքների վիճարկման փաստը Սահմանադրական դատարանում միջազգային ասպարեզում արդեն իսկ տհաճ է իշխանությունների համար: Մինչև վերջին օրը Րաֆֆի Հովհաննիսյանը չէր հստակեցնում՝ Սահմանադրական դատարան դիմելու է, թե ոչ: Շատերի մոտ համոզվածություն կար, որ ամեն դեպքում ընտրությունների արդյունքները չեն վիճարկվելու: Դա նպաստեց, որ իշխանությունները դիվանագիտական ամբողջ մեքենան աշխատեցնեն Սերժ Սարգսյանի համար շնորհավորանքներ բերելու համար:
Հայկական իրականությանը ծանոթ լինելով՝ Արևմուտքը ամեն դեպքում գործընթացները գնահատելիս առաջնորդվում է իրավական ընկալմամբ: Այսինքն՝ ընտրությունների արդյունքները հրապարակում բողոքարկող ընդդիմությունը մեկ շաբաթից ավելի է, ինչ նույն գործողությունը չէր անում իրավական հարթությունում: Միջազգային հանրության մոտ այս հանգամանքը որոշակի անվստահություն է առաջացնում ընդդիմության գործողությունների նկատմամբ: Արդյունքում, օրինակ, ԱՄՆ-ի նախագահ Բարաք Օբաման փետրվարի 18-ի ընտրություններից 12 օր անց շնորհավորական ուղերձ հղեց Սերժ Սարգսյանին: Սակայն զուտ իրավական տեսակետից նույն Միացյալ Նահանգները կարող էր հայտնվել բավական անհարմար դրության մեջ, քանի որ տեսականորեն Սահմանադրական դատարանը կարող է որոշում կայացնել ընտրությունների երկրորդ փուլ նշանակելու կամ Սերժ Սարգսյանի հաղթանակը չեղյալ հայտարարելու մասին: Այդ դեպքում կստացվի, որ Օբաման շնորհավորել է մի նախագահի, որը, ըստ Սահմանադրական դատարանի՝ բավարար իրավական հիմք չի ունեցել իրեն նախագահ հռչակելու:
Սա անհարմար իրավիճակի մեջ է դնում գործող իշխանություններին, որոնք հավանաբար շնորհավորանքները կորզելու համար միջազգային հանրությանը վստահեցրել են, որ ներքաղաքական իրավիճակը ամբողջովին վերահսկում են: Բացի այդ՝ փետրվարի 18-ի նախագահական ընտրությունները հավակնում էին դառնալ Հայաստանի նորանկախ պատմության մեջ առաջին (1991թ. ընտրությունները չհաշված) նախագահական ընտրությունները, որի արդյունքները չեն վիճարկվել Սահմանադրական դատարանում: Սակայն Րաֆֆի Հովհաննիսյանի՝ ՍԴ դիմելու որոշումը խառնել է իշխանությունների քարտերը: Թերևս այդ պատճառով է, որ իշխանության վերահսկողության տակ գտնվող լրատվամիջոցները լայնամասշտաբ «հարձակում» են սկսել Րաֆֆի Հովհաննիսյանի դեմ: