Yahoo!-ն բրիտանացի 17-ամյա դպրոցական Նիք Դ’Ալոզիոյից $30 մլն-ով գնել է բջջային Summly ծրագիրը: Վերջինս սմարթֆոնների ու պլանշետների տերերին թույլ է տալիս գտնել, կարդալ և փոխանակել առցանց նորություններ և զանազան տեղեկատվություն: Ծրագիրն ամբողջությամբ ցույց չի տալիս նյութերի տեքստը, այլ արագ ծանոթանալու նպատակով կազմում է կարճ հաղորդագրություններ՝ ամենակարևոր տեղեկություններով:
Գործարքի ֆինանսական պայմանները չեն հրապարակվում, սակայն հայտնի է, որ ծառայությունը գնվել է $30 մլն-ով: London Evening Standard պարբերականը գրել է, որ Yahoo!-ն Summly-ի համար վճարել է 20-40 մլն ֆունտ ստեռլինգ: Գումարի մեծ մասը ծրագրի հեղինակին կվճարվի կանխիկ, 10%-ը՝ ընկերության բաժնետոմսերի տեսքով:
Նիք Դ’Ալոզիոն հավելվածը ստեղծել է 15 տարեկանում՝ դպրոցում սովորելիս: Այժմ Նիքն ու Summly-ի մշակմանը մասնակցած նրա մի քանի ընկերներն աշխատանքի կանցնեն Yahoo!-ում, քանի որ գործարքի ավարտից հետո, ըստ պայմանների, նա պետք է փակի ծրագիրը:
Yahoo!-ն մտադիր է Դ’Ալոզիոյի մշակած լրատվական տեքստերի վերլուծության ալգորիթմն օգտագործել իր բջջային ծառայություններում:
