Gallup World կազմակերպությունը հրապարակել է 2010-2012 թթ. նախկին խորհրդային հանրապետություններում անցկացրած իր հարցումների արդյունքները, ըստ որոնց՝ ամենաշատը Հայաստանից են մարդիկ ցանկանում արտագաղթել՝ 40%, և ամենաքիչը՝ Ուզբեկստանից՝ 5%: 12 երկրներում իրականացված հարցմանը մասնակցել է 41 072 չափահաս՝ 15 և ավելի բարձր տարիքի:
Gallup-ն իր կայքում հրապարակած ամփոփագրում նշում է, որ Կենտրոնական Ասիայի երկրներից երիտասարդները ավելի քիչ են հակված արտագաղթել, քան ընդհանուր նախկին ԽՍՀՄ տարածքից:
Հարցին՝ «հնարավորության դեպքում դուք կտեղափոխվեի՞ք այլ երկիր մշտական բնակության, թե՞ կնախընտրեիք մնալ ձեր երկրում», ըստ երկրների՝ տեղափոխվելու օգտին արտահայտվածների հետևյալ պատկերն է ստացվել.
Հայաստան՝ 40%,
Մոլդովա՝ 32%,
Ուկրաինա՝ 21%,
Բելառուս՝ 17%,
Ղրղըզստան՝ 16%,
Ռուսաստան՝ 14%,
Ադրբեջան՝ 14%,
Վրաստան՝ 14%,
Ղազախստան՝ 13%,
Տաջիկստան՝ 11%,
Թուքմենստան՝ 6%,
Ուզբեկստան՝ 5%:
Այլ երկրում մշտական բնակություն հաստատել ցանկացողների միջին թիվն այս երկրներում կազմել է 15%:
2011-2012 թթ. հարցվածները այլ երկիր մշտական բնակության տեղափոխվելու հիմնական պատճառ նշել են սոցիալ-տնտեսական գործոնները: Նախկին ԽՍՀՄ երկրներում պոտենցիալ արտագաղթողների 52%-ը նշել է, որ ցանկանում է բարձրացնել կենսամակարդակը ավելի լավ պայմաններ ունեցող երկրում: 10%-ն էլ ասել է, որ ցանկանում է ավելի լավ աշխատանք գտնել կամ չի կարողանում աշխատանք գտնել իր երկրում: Ութ հոգուց մեկը նշել է, որ մտածում է ավելի շատ ոչ թե իր, այլ իր երեխաների ապագայի մասին:
Աղյուսակ. Այլ երկիր մշտական բնակության մեկնելու ցանկության հիմնական պատճառները
% |
|
ավելի լավ կենսամակադրակը |
52 |
երեխաների ապագան |
13 |
ավելի լավ աշխատանք գտնելը/սեփական երկրում աշխատանք չգտնելը |
10 |
սոցիալական օգուտներն ու արտոնությունները |
4 |
ընտանիքին ավելի մոտ լինելը |
3 |
ապրելը մի երկրում, որտեղ մարդու իրավունքները պաշտպանված են |
3 |
ապրելը մի երկրում, որտեղ ավելի քիչ հանցագործություն կա |
1 |
սեփական երկրում բնապահպանական խնդիրները |
1 |
այլ պատճառներ |
2 |
չգիտեմ/հրաժարվում եմ պատասխանել |
12 |
Որոշ երկրներում արտագաղթելու ցանկության գլխավոր գործոնը երեխաների ապագան է: Ընդհանուր արտագաղթողների շարքում հանուն դրա առավել շատ կցանկանային արտագաղթել Թուրքմենստանից՝ 29% և Ղազախստանից՝ 21%: Հայաստանի դեպքում 13%-ն է դա նշել որպես արտագաղթելու պատճառ:
Ընդ որում՝ կանայք հարցված 12 երկրներում ավելի հակված են արտագաղթել հանուն երեխաների ապագայի, քան՝ տղամարդիկ՝ 17% և 10% համապատասխանաբար:
Gallup-ի մասնագետները որպես եզրակացություն նշում են, որ այս երկրների ղեկավարները ավելի լավ պետք է հասկանան այն պատճառները, թե ինչու են մարդիկ ուզում երկրից հեռանալ: «Նախկին ԽՍՀՄ երկրներում արտագաղթելու հիմնական պատճառը տնտեսական պայմաններն են, սակայն մարդիկ ցանկանում են արտագաղթել նաև հանուն երեխաների ապագայի»,- նշում են Gallup-ի մասնագետները և հավելում, որ եթե երկրները չկարողանան համապատասխան աշխատատեղեր ապահովել, շատերը պարզապես ինքնըստինքյան կշարժվեն երկիրը լքելու իրենց ցանկությունից ելնելով՝ հանուն ավելի լավ աշխատանքի և ավելի լավ կենսամակարդակի: