Երևանցիները հաստատ լսած ու տեսած կլինեն, որ շաբաթ օրը՝ ապրիլի 6-ին, Երևանի երկնքում ուղղաթիռ էր պտտվում: Հավանաբար իմացած կլինեն նաև, որ այդ օրը մի շարք փողոցներ, այդ թվում՝ Պռոշյանը, Մաշտոցը և Բաղրամյանը, փակվել էին: Երևի նաև հիշում են, որ այդ օրը շատ արևոտ էր, ոչ մի ամպ չկար, կապույտ երկինք էր:
Բոլորն էլ երևի իմացած կլինեին, որ իրականացվում է Հայաստանի Հանրապետության նախագահի երդմնակալության արարողության փորձը: Բայց երևի քչերը պատկերացնեին, որ այդ օրը ոչ թե երդմնակալության փորձն էր արվում, այլ պարզապես երդմնակալությունն էր նկարահանվում:
Ապրիլի 9, Հ1-ի «ուղիղ եթեր»: Բոլորս գիտենք, որ ամպամած օր է, սակայն չգիտես ինչու՝ Սերժ Սարգսյանի՝ մոտոցիկլետներով ուղեկցվող ավտոմեքենաների շարասյունը երթևեկում էր արևոտ քաղաքում: Երևում էին այդ շարասյան կադրերը վերևից:
Զարմանալիորեն, սակայն, այդ օրը և ոչ մի երևանցի ուղղաթիռի ձայն չլսեց: Այդ ինչպե՞ս պատահեց, որ «ուղիղ եթերով» վերևից կադրեր են ցույց տալիս, բայց ոչ ոք իրական ժամանակում ուղղաթիռի ձայն չի լսում: Միգուցե երևանցիներն արդեն խլացե՞լ են կամ դա հատուկ տեխնոլոգիաներով հայկական արտադրության գերժամանակակից ուղղաթիռ է, որ անգամ ձայն չի հանում ու անտեսանելի է:
Ապրիլի 6. նմանապես՝ երկու մեքենա արևոտ օրով գնացին Մատենադարան, վերցրին Վեհամոր ավետարանը, ճոխ-ճոխ տեղափոխեցին Մարզահամերգային, որպեսզի Սերժ Սարգսյանը դրա վրա երդվի: Նույն պատկերը՝ Սահմանադրական դատարանից ՀՀ Սահմանադրությունը տանելիս:
Կարծեք թե, ապրիլի 9-ին Մաշտոցի պողոտան այդպես էլ չփակվեց: Բայց կարևորը՝ կադրերում փողոցը փակ էր: Իզուր ինչո՞ւ մի օր էլ քաղաքացիներին անհանգստացնել: Չէ՞ որ մեր պետությունը շատ է մտածում իր քաղաքացիների մասին…
Իսկ առհասարակ զարմանալ պետք չէ Հ1-ի «ուղիղ եթերից»: Ինչպես ընտրություններն են անցկացվում ու հաշվվում, թերևս այդպես էլ երդմնակալությունն է կազմակերպվում:
Եվ, ի տարբերություն իշխանությունների, իշխանության խոսափող Հ1-ը այլևս պատրանքներ չի էլ ուզում ստեղծել: Չէ՞ որ նրա ներկայացրած Հայաստանը միշտ էլ անդարդ ու արևոտ է:
