Մոլդովական սցենար՝ Հայաստանում

Երևանի ավագանու ընտրություններում ՀԱԿ-ի ցուցակի չորրորդ հորիզոնականը զբաղեցնող Վլադիմիր Կարապետյանի կարծիքով՝ իշխանությունները փորձելու են կեղծել մայիսի 5-ի ընտրությունների արդյունքները: ՍիվիլՆեթի հետ զրույցում նա ասում է, որ քաղաքական ուժերի միջև կոնսուլտացիաների նպատակն է կանխել այդ փորձը:

— ՀԱԿ-ը վերակազմակերպված գնում է Երևանի ավագանու ընտրություններին: Սակայն հիմա նորից շատերն են խոսում, որ կեղծվելու են ընտրությունները: ՀԱԿ-ի վերակազմակերպումը ինչ-որ կերպ կարո՞ղ է ազդել ընտրությունների վերահսկելիության վրա:

— Նախ՝ ինչ վերաբերում է կեղծելուն, ես չեմ պատկանում այն քաղաքական գործիչների, մեկնաբանների շարքին, ովքեր դրա մասին շատ հաճախ խոսում են, անգամ ինչ-որ հիասթափություն, հուսահատություն են տարածում՝ ասելով, որ անպայման կեղծվելու են: Փորձ է արվելու կեղծել, ինչը ՀՀԿ-ն միշտ է արել: Այս ընտրություններին մեր մասնակցությունը, նաև մեր գործընկեր կուսակցությունների հետ մեր կոնսուլտացիաները միտված են այդ փորձը կանխելուն:

Նախագահական ընտրությունների մասով մենք ասել ենք, որ Րաֆֆի Հովհաննիսյանը հաղթել է: Ամենակարևոր հանգամանքն այն է, որ փաստաթղթերով, այսինքն՝ այն արձանագրություններով, որ կան տեղամասերից, նույնպես երևում է, որ Րաֆֆին հաղթել է:

«Ժառանգության» հանձնաժողովների անդամները, վստահված անձինք պետք է այդ թղթերը բերեին: «Ժառանգությունը» չկարողացավ դա ապահովել: Ես ցավով եմ դա ասում: Հիմա ՀԱԿ-ը՝ իր վստահված անձանցով, հանձնաժողովների անդամներով, գումարած այն գործընկեր կուսակցությունները, որոնց հետ ակտիվ կոնսուլտացիաների ու համագործակցության մեջ ենք, ամեն բան պետք է անենք, որ մեծամասնություն ստեղծենք հանձնաժողովներում:

— Ձեզ համար այս ընտրությունները քաղաքակա՞ն են, թե՞ ավելի շատ քաղաքատնտեսական: Այսինքն՝ կանաչապատում, վերելակներ, տրանսպորտ:

— Շատ կարևոր եմ համարում այդ երկրորդ տարրը և գտնում եմ, որ ներկա իշխանությունը քաղաքատնտեսական տարրի մասով ձախողել է ամբողջությամբ: Բայց առաջին հերթին սա քաղաքական ընտրություն է: Սա նաև օրենքի պահանջն է. օրենքը նախատեսում է, որ այս ընտրություններին միայն քաղաքական կուսակցություններն են մասնակցում և միայն ցուցակներով են մասնակցում:

— Ես ֆորմալ առումով նկատի չունեմ: Քաղաքական ասելով՝ ենթադրվում է իշխանափոխություն:

— Բնականաբար՝ քաղաքական: Խորհրդարանական ընտրություններում ՀՀԿ-ն չնայած ահռելի գումարներ ծախսեց, կաշառք բաժանեց, շատ մեծ ռեսուրսներ ներդրեց, բայց չկարողացավ հատել 35-36% սահմանը: Եթե նա նույն արդյունքը ունենա, իսկ այդքան ռեսուրս չունի, չի կարողանա քաղաքապետ նշանակել:

— Իսկ ինչո՞ւ չունի:

— Կարծում եմ՝ նախագահական վերջին ընտրությունները ցույց տվեցին, որ Սերժ Սարգսյանի վարկանիշը գնալով ավելի է մոտենում զրոյի ցուցանիշին: Այսինքն՝ նույնիսկ նրա թիմի անդամները, նույնիսկ պետական ծառայողները, որոնք կարծես պետք է քվեարկեին նրա օգտին, ձայնը տվել են ընդդիմությանը, և դա ակնհայտ է: Նույնն է Տարոն Մարգարյանի դեպքում. բոլորը գիտեն, որ նա գործարարի կենսագրություն չունի, բայց ամենահարուստ մարդկանցից է, մի քանի բնակարաններ ունի քաղաքի կենտրոնում և Ավանում, իր հաշվին 300 հազ. դոլար ունի: Ես առիթ ունեցել եմ նրան ուղիղ հարց տալու, թե որտեղից նրան այդ գումարները: Ես կասկածում եմ, որ որևէ բանական մարդ, որը գիտի, որ Տարոն Մարգարյանը բացատրություն չի տվել այդ հարստության ծագումնաբանության վերաբերյալ, կգնա և նրան ձայն կտա: Միայն բերովի կամ ընտրակաշառքի ճանապարհով մարդիկ կարող են ՀՀԿ-ին և Տարոնին ձայն տալ:

— Քաղաքական ուժերի համագործակցության մասին շատ է խոսվում: Ի՞նչ եք կարծում, ընտրություններից հետո որքանո՞վ է հավանական, որ ոչ իշխանական ուժերը կարողանան, իրենց ստացած ձայները գումարելով, որակ ստանալ:

— Շատ լավ հարց եք տալիս: Իշխանահաճո անձինք և իշխանամետ լրատվամիջոցները տարածում են, թե իբր ընդդիմությանը չի հաջողվել միավորվել ու երբեք չի հաջողվի, և այսպես առանձին-առանձին գնալով՝ նրանք ձախողվելու են: Դա հատուկ է տարածվում, կրկնում եմ՝ այն միջոցներից, որոնք ծառայում են Սերժ Սարգսյանին: Ուրիշ միջոցներ, ուրիշ անձինք, որոնք ուզում են, որ փոփոխություններ լինեն, խոսում են ապագայի մասին, ընդդիմությանը հորդորում են համագործակցել, նույնիսկ եթե առանձին ճանապարհներով են գնալու: Իսկ առանձին ճանապարհով գնալը շատ նորմալ եմ համարում, որովհետև բոլորս տարբեր ենք և չէինք կարող միասնական ցուցակով գնալ: Դա անհնար է: Բայց մենք հիմա կոնսուլտացիաների մեջ ենք, և շատ հնարավոր է, որ եթե ՀՀԿ-ն 40 տոկոս չհավաքի, մենք նույնիսկ հարկադրված լինենք միասին քաղաքապետ նշանակել մեր ավագանու անդամների կազմից: Դա մայրաքաղաքում կհանգեցնի դրամատիկ փոփոխությունների:

— Դա կլինի Լևոն Տեր-Պետրոսյանի նշած բուրժուադեմոկրատական հեղափոխության սկի՞զբը:

— Դա կլինի շատ նման նրան, ինչ եղավ մի քանի տարի առաջ Մոլդովայում, երբ նույն կերպ ընդդիմությունը ներկայացնող կուսակցությունները առանձին ճանապարհներով գնացին, բայց հենց արդյունք գրանցեցին, միավորվեցին և իշխանությունը վերցրին:

Զրուցել է Դերենիկ Մալխասյանը