Ամերիկյան Associated Press գործակալության աղբյուրները հաղորդում են, որ բոստոնյան մարաթոնյան վազքի ժամանակ իրականացված պայթյունների կազմակերպման մեջ կասկածյալները ծագումով Ռուսաստանի՝ Չեչնիային հարակից շրջանից են։ ԱՄՆ-ի ոստիկանությունը այժմ Բոստոնի արվարձանում իրականացնում է մասշտաբային գործողություն՝ փորձելով ձերբակալել կասկածյալներից մեկին։
Մյուս կասկածյալը ոստիկանության հետ փոխհրաձգության ընթացքում սպանվել է լույս ապրիլի 19-ին։
Գործակալությունը հաղորդում է, որ ողջ մնացած կասկածյալը 19-ամյա Ջոխար Ցարնաևն է, որը վերջին մեկ տարում ապրել է Միացյալ Նահանգներում։
Ոստիկանությունը գործողությունը սկսել է այն բանից հետո, երբ ապրիլի 18-ին՝ ուշ երեկոյան, Մասաչուսեթսի տեխնոլոգիական համալսարանի տարածքում փոխհրաձգության ընթացքում ոստիկան է սպանվել։
Բոստոնի արվարձան Ուոթերթաուն են ժամանել ոստիկանության բազմաթիվ ստորաբաժանումներ։
Մասաչուսեթս նահանգի իշխանությունները որոշել են կասկածյալի որոնումների ընթացքում մի շարք շրջաններում դադարեցնել ամբողջ տրանսպորտի և հաստատությունների աշխատանքը։ Ինչպես հայտարարել է ոստիկանության ներկայացուցիչը, խոսքը Ուոթերթաունի մոտ 20 թաղամասի մասին է։
Հիշեցնենք, որ Բոստոնում մարաթոնյան վազքուղու վերջնագծի մոտ ապրիլի 15-ի գիշերը որոտացել էր երկու պայթյուն, որոնց հետևանքով զոհվել էր երեք մարդ, ավելի քան 170-ը՝ ստացել տարբեր աստիճանի վնասվածքներ։
