Մենք որևէ մեկի դեմ չենք պայքարում, մենք մրցակցում ենք բոլորի հետ. նշեց ՕԵԿ վարչության անդամ, ՀՀ սփյուռքի փոխնախարար Դավիթ Կարապետյանը՝ «Կենտրոն» հեռուստատեսության «Ուրվագիծ» հաղորդման շրջանակում խոսելով Երևանի ավագանու ընտրությունների մասին:
«Երևանի թիվ մեկ խնդիրը ինչպես աշխատատեղերի ստեղծումն է, այնպես էլ՝ քաղաքի արդիականացումը. դա նախևառաջ՝ կանաչ տարածքն է, էլեկտրոնային վահանակներն են, զբոսայգիները, վազքուղիները»,- ասաց նա:
Կարապետյանը նշեց, որ անհանդուրժելի է, որ այսօր Երևանում զբոսաշրջիկը չի կարող կողմնորոշվել էլեկտրոնային քարտեզների միջոցով, չի կարող ինքնուրույն օգտվել հանրային տրանսպորտից: Քաղաքի արդիականացումը, նրա խոսքով, նույնքան կարևոր հարց է, որքան՝ Ղարաբաղյան հարցի կարգավորումը: «Հեծանիվները վաղուց հատնագործված են, ուղղակի պետք է ուսումնասիրել միջազգային փորձը»,- ասաց նա:
Կարապետյանը խոսեց նաև «բարձրահարկների կատաստրոֆիկ վիճակի» մասին. «Մենք առաջարկում ենք ազատականացնել հանրային ծառայությունների ոլորտը, որպեսզի կատարվեն երկարաժամկետ ներդրումներ, բնակիչն էլ վճարի մատուցված ծառայությունների համար»: «Թե չէ մենք ունենք շենքեր կենտրոնում, որտեղ բնակարանների գներն այնքան են, որքան՝ Պրահայում, բայց այդ շենքերի վերելակները մտնելիս պետք է խաչակնքվես»,- նշեց նա:
«Մարդը կարիք ունի նաև հոգևոր արժեքների,- ասաց Կարապետյանը,- մենք կառաջարկենք բազմաթիվ հետաքրքիր մշակութային միջոցառումներ, որ մարդն այլևս չուզենա գնալ ռաբիզ համերգի: Սոցիալապես անապահով մարդկանց հնարավորություն կտանք անվճար այցելել թանգարան, թատերասրահ»: Մարզասրահները ևս պետք է հանրամատչելի դառնան. «Յուրաքանչյուր թաղամասում պետք է ունենանք շատ մատչելի մարզասրահներ ու վազքուղիներ: Այդ սրահներից օգտվողները ուղղակի չեն ծխի»,- ասաց նա՝ պատասխանելով ծխելու դեմ պայքարի մասին հարցին:
Որպես սփյուռքի փոխնախարար՝ Կարապետյանը նշեց, որ քաղաքը բավական մեծ անելիքներ ունի, որպեսզի դառնա գրավիչ ներդրումների՝ հատկապես սփյուռքահայերի ներդրումների համար:
ՕԵԿ վարչության անդամը պատասխանեց նաև այն հարցին, թե ինչու 2008-ին ՕԵԿ-ը չմիացավ Լևոն Տեր-Պետրոսյանին և հրապարակ դուրս եկած ժողովրդին. «Միանայինք, որ ի՞նչ անեինք. գնայինք Լևոն Տեր-Պետրոսյանի առանձնատուն նրա հետ թեյ խմելո՞ւ, զոհերն էլ լինեին մի քանի հարյո՞ւր: Իսկ ինչո՞ւ Լևոն Տեր-Պետրոսյանը չիջավ իր առանձնատնից, որ առաջնորդեր ժողովրդին»:
