Րաֆֆի Հովհաննիսյանին տրված ձայները Րաֆֆի Հովհաննիսյանի ձաներն էին. «Ա1+»-ի հյուրասրահում նշեց Երևանի ավագանու ընտրություններում «Բարև Երևան» դաշինքի ցուցակով առաջադրված Դավիթ Սանասարյանը: Նրա խոսքով՝ Րաֆֆի Հովհաննիսյանին ձայն են տվել նաև այն մարդիկ, ովքեր մարդու պայքարող տեսակը չեն, այլ՝ համակրում են Հովհաննիսյանին՝ վստահելով նրա ազնվությանը, կյանքին, անցած ճանապարհին, բայց հետընտրական պրոցեսներում ավելացան պայքարողները:
Այս ընտրություններին մասնակցելու որոշում կայացրած քաղաքական ուժերը, ըստ Սանասարյանի, չեն կարող պակասեցնել «Բարև Երևան» դաշինքի ձայները. «թեպետ Րաֆֆի Հովհաննիսյանը չի մասնակցում այս ընտրություններին, բայց իր համակրանքն է հայտնել այս դաշինքի հանդեպ»: «Ես չեմ ընդունում, որ ասում են՝ թե դրանք Րաֆֆի Հովհաննիսյանի ձայները չէին [նախագահական ընտրություններին ստացած ավելի քան կես միլիոն քվեները], այլ՝ «Բարգավաճ Հայաստան»-ինը կամ մյուսներինն էին: Այդպես որ լինի, պիտի հետ գնալով ասենք՝ դրանք Վազգեն Մանուկյանի ձայներն էին կամ դրանից էլ առաջ»,- նշեց նա՝ հիշեցնելով, որ նախագահական ընտրություններում բազմաթիվ անվավեր քվեաթերթիկներ են եղել, և թերևս, իրենց քվեաթերթիկն անվավեր դարձրած մարդիկ այս ընտրություններին ներկայացված քաղաքական ուժերի մեջ կարող են գտնել իրենց համար համակրելի մեկը:
Լուսանկարը՝ hetq.am-ի
