Վճարում ենք 100 դրամ և իջնում. բողոքի ակցիա երթուղայինների թանկացման դեմ

Այսօր Երևանում տասնյակ ակտիվիստներ թռուցիկներ էին բաժանում՝ քաղաքացիներին կոչ անելով քաղաքային տրանսպորտից օգտվելիս նախկինի նման վճարել 100 դրամ, ոչ թե քաղաքապետարանի սահմանած նոր սակագինը՝ 150 դրամը: Ակտիվիստները թռուցիկներ էին կպցրել կանգառներում, մեծ տառերով գրել էին «100 դրամ» ավոտբուսների կանգառների դիմաց:

Ակցիայի մասնակիցները նշում էին, որ երթուղայինների գծատերերը իրականում սակագնի բարձրացումից ցանկանում են գերշահույթներ ստանալ: Գծատերերի թվում նրանք նշում էին Երևանի քաղաքապետ Տարոն Մարգարյանի, ԱԺ հանրապետական պատգամավոր Գալուստ Սահակյանի և գործարար-պատգամավոր Սամվել Ալեքսանյանի, տրանսպորտի և կապի նախարար Գագիկ Բեգլարյանի և Ամենայն հայոց կաթողիկոս Գարեգին Բ-ի անունները:

Մի շարք ակտիվիստներ տարվել էին ոստիկանություն:

Երևանի քաղաքապետարանի որոշմամբ՝ հուլիսի 20-ից քաղաքում երթուղային տրանսպորտի և ավտոբուսների սակագինը 100 դրամից բարձրացել է 150 դրամ: