Կենտրոն և Նորք-Մարաշ վարչական շրջանների ընդհանուր իրավասության դատարանը` դատավոր Գագիկ Պողոսյանի նախագահությամբ, սեպտեմբերի 23-ին հրապարակել է նախագահի նախկին թեկնածու, ԱԻՄ առաջնորդ Պարույր Հայրիկյանի դեմ մահափորձի գործով դատավճիռը:
Դատարանի որոշման համաձայն` նախագահի նախկին թեկնածու, էպոսագետ Վարդան Սեդրակյանը մեղավոր է ճանաչվել սպանության փորձը կազմակերպելու մեջ և դատապարտվել 14 տարվա ազատազրկման: Նույն գործով անցնող ամբաստանյալ Խաչատուր Պողոսյանը ևս դատապարտվել է 14, իսկ Սամվել Հարությունյանը` 12 տարվա ազատազրկման:
Դատավճռով դատարանն առանց քննության է թողել ամբաստանյալներից գումարների բռնագանձման վերաբերյալ տուժող Պարույր Հայրիկյանի հայցը:
Սեդրակյանի փաստաբան Ալեքսանդր Սիրունյանը Ֆեյսբուքում գրառում է կատարել, որում մասնավորապես ասված է. «Վարդան Սեդրակյանի գործով դատավճռի վերաբերյալ մեկնաբանություններ այս պահի դրությամբ չունենք, քանի որ վճիռը մեզ դեռ չի հանձնվել:
Վճիռը ստանալուց հետո կկազմենք վերաքննիչ բողոք և կհրավիրենք մամուլի ասուլիս` պատասխանելու ձեր բոլոր հարցերին»:
2013թ. հունվարի 31-ին` ժամը 23:20-ի սահմաններում, Հայրիկյանի տան շքամուտքի մոտ երկու անգամ կրակել էին Հայրիկյանի կրծքավանդակին և դիմել փախուստի:
Ձեռք բերված ապացույցների հիման վրա Վ. Սեդրակյանին մեղադրանք էր առաջադրվել ՀՀ քրեական օրենսգրքի 38-34-305-րդ հոդվածով (Պետական, քաղաքական կամ հասարակական գործչի սպանության փորձը կազմակերպել), Խ. Պողոսյանին` ՀՀ քրեական օրենսգրքի 34-305-րդ հոդվածով (Պետական, քաղաքական կամ հասարակական գործչի սպանության փորձ) և 235-րդ հոդվածի 1-ին մասով` (Ապօրինի կերպով զենք ձեռք բերելը, պահելը և իրացնելը), իսկ Ս. Հարությունյանին` ՀՀ քրեական օրենսգրքի 34-305-րդ հոդվածով (Պետական, քաղաքական կամ հասարակական գործչի սպանության փորձ):
Լուսանկարը` Ֆոտոլուրի
