Ստորագրվել է հայ-հունական ռազմական համագործակցության ծրագիր

Զինված ուժերի գլխավոր շտաբի պետ, գեներալ-գնդապետ Յուրի Խաչատուրովի հրավերով սեպտեմբերի 25-ին պաշտոնական այցով Հայաստան է ժամանել Հունաստանի Հանրապետության ազգային պաշտպանության գլխավոր շտաբի պետ, գեներալ Միխայիլ Կոստարակոսի գլխավորած պատվիրակությունը, հաղորդում են ՊՆ մամուլի ծառայությունից:

Այցի ընթացքում գեներալ Կոստարակոսին ընդունել է նախագահ Սերժ Սարգսյանը: 

Պաշտպանության նախարարության վարչական համալիրում տեղի ունեցած պաշտոնական դիմավորման արարողությունից հետո տեղի է ունեցել առանձնազրույց գեներել-գնդապետ Յու.Խաչատուրովի և գեներալ Կոստարակոսի միջև, այնուհետև` հանդիպում ընդլայնված կազմով ՀՀ ԶՈՒ ԳՇ և ՀԱՊԳՇ բարձրաստիճան պաշտոնյաների մասնակցությամբ:

Պաշտոնական հանդիպումների և տեղի ունեցած բանակցությունների ընթացքում քննարկվել են հայ-հունական երկկողմ ռազմական համագործակցությանը, ինչպես նաև տարածաշրջանային և միջազգային անվտանգությանն առնչվող հարցեր: Հանդիպման ավարտին ՀՀ ՊՆ պաշտպանական քաղաքականության վարչության պետ Լևոն Այվազյանի և ՀԱՊԳՇ արտաքին հարաբերությունների դիրեկտորատի ղեկավար, բրիգադի գեներալ Ալեքսանդրոս Դիակոպուլոսի կողմից ստորագրվել է Հայաստանի Հանրապետության պաշտպանության նախարարության և Հունաստանի Հանրապետության ազգային պաշտպանության նախարարության միջև ռազմական համագործակցության 2014թ. ծրագիրը, որում ընդգրկված են մեկ տասնյակից ավելի դասընթացներ, անհատական և ստորաբաժանումների կազմով վարժանքներ և փորձի փոխանակման միջոցառումներ Հունաստանում և Հայաստանում:

Այցի ավարտին գեներալ Կոստարակոսի գլխավորած պատվիրակությունը այցելել է նաև Հայոց Մեծ Եղեռնի հուշահամալիր և ծաղկեպսակ դրել Ցեղասպանության զոհերի հիշատակը հավերժացնող հուշարձանին: