Դիարբեքիրի Սուրի քաղաքապետարանի մուտքին չորս լեզվով ցուցանակ է փակցվել, որի վրա քրդերեն, թուրքերեն, հայերեն և ասորերեն գրված է «Սուրի քաղաքապետարան», հայտնում է թուրքական Milliyet-ը:
Սուրի փոխքաղաքապետ, «Խաղաղություն և ժողովրդավարություն» քրդական կուսակցության անդամ Նաքշի Սայարը ցուցանակի տեղադրման կապակցությամբ հայտարարել է, որ դա աննախադեպ իրադարձություն է, և Թուրքիայում երբևէ այդպիսի բան չի եղել: Ըստ նրա՝ քաղաքապետարանում սրտանց ցանկանում էին, որ ցուցանակը գրված լիներ նաև տարածաշրջանում առկա այլ լեզուներով՝ դա որակելով որպես երախտագիտության դրսևորում [ի դեպ՝ քաղաքապետարանի անունը ցուցանակի վրա հայերենով գրված է հետևյալ կերպ՝ «Sur քաղաքապետարանները» – ՍիվիլՆեթ]:
Փոխքաղաքապետը ցուցանակը փակցնելու փաստը զարմանալիորեն կապել է իսլամի հետ՝ ասելով. «Ես իսլամական ինքնության կրող եմ. կախելով այս բազմալեզու ցուցանակը՝ կատարում եմ իսլամի առաջ իմ պարտականությունը: Տիեզերքն էլ, լեզուներն էլ Ալլահն է ստեղծել: Ուզում եմ կոչ անել իսլամական շրջանակներին՝ որտեղ էլ լինեք, ինչ պաշտոն ու ուժ էլ ունենաք, հարգե՛ք լեզուները: Ալլահն է ստեղծել դրանք»:
Մարտի 30-ին Թուրքիայում տեղի են ունենալու տեղական ինքնակառավարման մարմինների ընտրություններ, և բացառված չէ, որ ցուցանակի տեղադրումը կապված է հենց ընտրությունների հետ, որոնց մասնակցում է նաև քրդական կուսակցությունը: Հնարավոր է՝ նրանք ակնկալում են ստանալ իսլամացած հայերի ձայները, որոնք հատկապես Դիարբեքիրի շրջանում մեծ թիվ են կազմում:
Սուրի քաղաքապետ Աբդուլլահ Դեմիրբաշի նախաձեռնությամբ Սուր մտնող ճանապարհին գրված է «Բարո՛վ եկաք», իսկ «Դիարբեքիր» զբոսաշրջային ուղեցույցը թարգմանվել է հայերեն:
