Վարչապետ Տիգրան Սարգսյանի մասնակցությամբ Երևանի բժշկական համալսարանի դահլիճում տեղի է ունեցել Հայաստանի երիտասարդական հիմնադրամի կողմից հայտարարված կրթաթոշակի մրցույթի հանձնման արարողությունը:
Ինչպես հաղորդում են կառավարության մամուլի ծառայությունից, ընդհանուր առմամբ, մրցույթի շրջանակում ուսման վարձի փոխհատուցում է ստացել 780 ուսանող: Նրանցից մի քանիսին կրթաթոշակի հավաստագիրը հանձնել է անձամբ վարչապետը:
«Ամեն անգամ ձեզ հանդիպելիս մի փոքր հուզվում եմ, որովհետև հիշում եմ իմ ուսանողական տարիները: Իհարկե, այսպիսի մթնոլորտը լիցքավորվելու և նոր էներգիայով լցվելու բացառիկ հնարավորություն է: Մենք ինչ էլ անենք ձեզ համար՝ միևնույն է քիչ է, դուք արժանի եք ավելիին: Կառավարության կարևորագույն խնդիրներից մեկն էլ այն է, որ դուք ձեզ երջանիկ զգաք մեր հայրենիքում և ձեր ապագան կապեք հայրենիքի հետ»,- նշել է վարչապետը:
Տիգրան Սարգսյանը հավաստիացրել է, որ այս ծրագիրը լինելու է շարունակական, քանի որ այն նաև ուսանողության ինքնակազմակերպման լավ ձև է: Վարչապետը հիշեցրել է, որ հենց ուսանողներն են սահմանում կրթաթոշակ ստանալու չափորոշիչները, ընտրում, թե ում պետք է հանձնվի կրթաթոշակ, վերահսկում, որպեսզի այդ գործընթացը լինի թափանցիկ:
Կրթաթոշակի մրցույթը հայտարարվել է պետական բուհերի առկա ուսուցման բակալավրիատում սովորող 1-ին կուրսի անվճար համակարգում չընդգրկված ուսանողների համար: Մրցույթի անցկացման համար կառավարությունը Երիտասարդական հիմնադրամին է հատկացրել 60 մլն դրամ:
2014-ին ընդհանուր առմամբ, մրցույթին մասնակցելու հայտ է ներկայացրել մոտ 1500 ուսանող: Դիմել են Հայաստանի գրեթե բոլոր պետական բուհերից, այդ թվում` մարզերում գործող և միջպետական բարձրագույն ուսումնական հաստատություններից: Կառավարությունում նշում են, որ ուսանողներին ընտրելիս հաշվի են առնվել սահմանված հստակ չափորոշիչները, մասնավորապես, ուսանողի առաջադիմությունը, սոցիալապես անապահով լինելու հանգամանքը, հասարակական ակտիվությունը և այլն:
