Թուրքիայի կառավարող՝ «Արդարություն և զարգացում» կուսակցությունը (ԱԶԿ, AKP)՝ վարչապետ Ռեջեփ Թայիփ Էրդողանի գլխավորությամբ, հաղթահարելով վերջին ամիսների կոռուպցիոն սկանդալներն ու մեղադրանքները, ըստ տվյալների՝ հաղթել է մարտի 30-ին Թուրքիայում անցած տեղական ինքնակառավարման մարմինների ընտրություններում:
Թուրքիայի տեղական ժամանակով ժամը 10:00-ի դրությամբ՝ հաշվվել էր քվեաթերթիկների 97,69 տոկոսը: Վերջին տվյալներով առաջին տեղում է AKP-ն՝ մոտ 45,56 տոկոս ձայներով: Երկրորդ տեղում է Թուրքիայի գլխավոր ընդդիմադիր՝ Ժողովրդահանրապետական կուսակցությունը (ԺՀԿ, CHP)՝ մոտ 27,91 տոկոս ձայներով, երրորդ տեղում՝ պահպանողական «Ազգայնական շարժում» կուսակցությունն է (ԱՇԿ, MHP)՝ 15,16 տոկոս ձայներով, չորրորդ տեղում՝ քրդական «Խաղաղություն և ժողովրդավարություն» կուսակցությունը (ԽԺԿ, BDP)՝ 4,01 տոկոս ձայներով:
Մարտի 30-ին Թուրքիայում տեղական ինքնակառավարման մարմինների ընտրություններին մասնակցել է 52,709,628 մլն մարդ: Թուրքիայի երեք խոշորագույն քաղաքներում՝ Անկարայում, Ստամբուլում և Իզմիրում, ձայները բաշխվել են հետևյալ կերպ.
Ստամբուլ – AKP 47,86%
Անկարա – AKP 44,68%
Իզմիր – CHP 50,18%
