Եվրո 2016-ի ընտրական փուլի երկրորդ տուրում Հայաստանի հավաքականը Վազգեն Սարգսյանի անվան «Հանրապետական» մարզադաշտում ոչ-ոքի` 1:1 հաշվով ավարտեց Սերբիայի հետ հանդիպումը:
Եթե առաջին խաղակեսի սկզբնամասում հյուրերը փոքր ինչ առավելություն ունեին, ապա 30-րդ րոպեից սկսած խաղը հավասարվեց, իսկ երկրորդ խաղակեսն անցավ մեր տղաների ակնհայտ առավելությամբ: Հայաստանի հավաքականը գերազանց հանդիպում անցկացրեց և շատ մոտ էր հաղթանակին:
73-րդ րոպեին մեր ընտրանու պաշտպան Ռոբերտ Արզումանյանը հայտնվեց կենտրոնական հարձակվողի դիրքում և գլխի գերազանց հարվածով բացեց հաշիվը: Մի քանի րոպե անց Արթուր Սարկիսովը 11 մետրանոց վաստակեց, բայց Մարկոսի հարվածից հետո սերբերի դարպասապահը ետ մղեց գնդակը:
Թվում էր Հայաստանի հավաքականը 3 միավոր կվաստակի, սակայն 90-րդ րոպեին Զորան Տոշիչը հավասարեցրեց հաշիվը` մեկ միավոր պարգևելով իր թիմին: Հայաստանի ընտրանին առաջին միավորը վաստակեց Եվրո 2016-ի ընտրական փուլում, թեև կարող ենք միանշանակ ասել, որ մենք այսօր 2 միավոր կորցրեցինք:
Վերջում ևս մեկ անգամ հիշեցնենք, որ այս հանդիպմանը չէին մասնակցում մեր առաջատարները` Հենրիխ Մխիթարյանը, Յուրա Մովսիսյանն ու Արազ Օզբիլիսը:
