Ըստ Բնապահպանական ճակատի՝ էկոնոմիկայի նախարարը դեմ է հանքարդյունահանման թափոնների հարկման նախաձեռնությանը։
Համահայկական բնապահպանական ճակատ նախաձեռնությունը դեկտեմբերի 10-ին հաղորդագրություն է տարածել՝ քննադատելով որոշ նախարարությունների, այդ թվում էկոնոմիկայի նախարար Կարեն Ճշմարիտյանին: Ըստ նախաձեռնության՝ Ճշմարիտյանը դեմ է հանդես գալիս հանքարդյունահանման հետևանքով առաջացած թափոնների հարկման նախաձեռնությանը։
«Բնապահպանական վճարների դրույքաչափերի մասին» 2012թ. օրենքը փաստացի սահմանում է, որ հանքարդյունահանման հետևանքով առաջացած թափոնները չեն հարկվում։ Բնապահպանության նախարարությունն առաջարկում է օրենքում կատարել փոփոխություններ, որոնցով նախատեսվում է 1,5-30 դրամ՝ 1 տոննա թափոնի դիմաց դրույքաչափը։
«Բնապահպանության նախարարությունը նախաձեռնել է «Բնապահպանական վճարների դրույքաչափերի մասին» ՀՀ օրենքում փոփոխություններ և լրացումներ կատարելու ողջունելի գործընթաց, որում փորձել է գոնե նվազագույն վճարներ սահմանել հանքարդյունահանման ոլորտում ներկայումս ընդհանրապես չհարկվող թափոնների համար։ Մի կողմ դնելով այն փաստը, որ առաջարկվող դրույքաչափերը չափազանց ցածր են (1 տոննա թափոնի դիմաց ընդամենը 1,5-30 դրամ)՝ տեսեք թե ինչպիսի լուրջ դիմադրություն են ցույց տվել որոշ նախարարություններ նույնիսկ այսպիսի ցածր դրույքաչափերի կիրառմանը։
Էներգետիկայի և բնական պաշարների նախարարությունը, երկար-բարակ «հիմնավորումներ» ու օրենքների այլ դրույթների հետ հակասություններ մեջբերելուց հետո, առաջարկել է ընդհանրապես հանել այդ փոփոխությունը, իսկ էկոնոմիկայի նախարար Կարեն Ճշմարիտյանը բառացիորեն գտնում է հետևյալը.
«Առաջարկվող փոփոխությունը կհանգեցնի զգալի ֆինանսական ծախսերի հանքարդյունահանման ոլորտում գործող ընկերությունների համար: Հաշվի առնելով, որ արդյունահանվող արտադրանքը հանդիսանում է բորսայական ապրանք, որի գինը ձևավորվում է միջազգային շուկայում, և որոնց բնորոշ է խիստ տատանողական վարքագիծ, ապա առաջարկվող փոփոխությունը բացասական ազդեցություն կունենա ներդրումային միջավայրի վրա, կխոչընդոտի գործող ընկերությունների բնականոն գործունեությունը և նոր ներդրողների մուտքը ոլորտ: Ուստի, առաջարկում ենք վերանայել լեռնաարդյունահանման ոլորտում նախատեսվող դրույքաչափերի կիրառումը»:
Հասկանալի է 2000-ականների սկզբում Հայաստանի հանքարդյունաբերության ոլորտի ձեռնարկությունները ջրի գնով վաճառելու գլխավոր ջատագովներից և անմիջական մասնակիցներից մեկի՝ Կարեն Ճշմարիտյանի մոտեցումը (բավական է միայն հիշել Զանգեզուրի պղնձամոլիբդենային կոմբինատի մասննավորեցման պատմությունը), չէ որ մեր երկրում պետական մակարդակով ընդունված կարգ է ինչպես սեփական, այնպես էլ յուրայինների բիզնեսները հնարավորինս զերծ պահել լրացուցիչ հարկերից և վճարներից»,- ասված է հաղորդագրությունում։
