«18.12.2014 ներկայանալ միջանկյալ քննության` հանձնարարված աշխատանքներով, որոնք պետք է լինեն հայկական հարցի՝ հրապարակ գալու և ցեղասպանության պնդումների դեմ…»
Թուրքիայի Դոքուզ Էյլյուլ համալսարանում Աթաթուրքի սկզբունքներ և հեղափոխության պատմություն առարկան դասավանդող դոկտոր Թյուրքան Բաշյիղիթը պարտադրում է իր ուսանողներին հերքել Հայոց ցեղասպանության իրողությունը, հաղորդում է marksist.org կայքը:
Դասախոսը պահանջում է ուսանողներից, որ «քննությանը ներկայանան այսպես կոչված հայոց ցեղասպանության վերաբերյալ» աշխատանքներով և փաստաթղթերով հիմնավորապես ժխտեն այն: Համալսարանում նա փակցրել է հետևյալ գրառումը.
«Ուշադրությո՛ւն, առաջին կուրսի ուսանողնե՛ր,
18.12.2014 ներկայանալ միջանկյալ քննության` հանձնարարված աշխատանքներով, որոնք պետք է լինեն հայկական հարցի՝ հրապարակ գալու և ցեղասպանության պնդումների դեմ` հիմնավորված այնպիսի փաստաթղթերով, որ Թուրքիան ցեղասպանություն չի իրագործել»:
«…հայկական սփյուռքը մեզնից նախ լավաշն է խլում, հետո…»
Marksist.org կայքը առանձնացրել է նաև Թյուրքան Բաշյիղիթի՝ Թվիթերում նոյեմբերի 27-ին արած հետաքրքրաշարժ գրառումը.
«Ովքեր ցավում են, որ հայերը մեզնից խլեցին լավաշը, ասեմ` հնարավոր է կորցնենք նաև մեր հողերը: Դուք պատրա՞ստ եք 2015-ին: Հայկական սփյուռքը մեզնից նախ լավաշն է խլում, հետո…..»: