Վերակառուցման և զարգացման եվրոպական բանկը Հայաստանին կհատկացնի 3,5 մլն եվրո վարկ: Վարկային համաձայանգիրը դեկտեմբերի 19-ի ստորագրել են ֆինանսների նախարար Գագիկ Խաչատրյանը և ՎԶԵԲ-ի երևանյան գրասենյակի տնօրեն Մարկ Դեյվիսը: Ինչպես հաղոդրում են ֆինանսների նախարարության մամուլի ծառայությունից Գագիկ Խաչատրյանը, Հրազդանի քաղաքապետ Արամ Դանիելյանը և Մարկ Դեյվիսը ստորագրել են նաև դրամաշնորհային համաձայնագիր, որով Հայաստանին կհատկացվի 3,5 մլն եվրո դրամաշնորհ` Եվրամիության Հարևանության ներդրումային գործիքի միջոցով: Ծրագրի շրջանակում ևս 1,07 մլն եվրոյի չափով գումար նախատեսվում է ստանալ որպես տեխնիկական աջակցություն:
Ծրագրի նպատակն է նպաստել Կոտայքի մարզում և Սևան քաղաքում կոշտ կենցաղային թափոնների կառավարման բարելավմանը: Ծախսերը կներառեն նոր աղբավայրի կառուցում, թափոնների հավաքման բեռնատարների, թափոնների համար կոնտեյներների (արկղների), աղբավայրի աշխատանքների համար մասնագիտացված սարքավորումների ձեռքբերում, իսկ տեխնիկական համագործակցության շրջանակում կիրականացվեն բնապահպանական և սոցիալական լրացուցիչ ուսումնասիրություններ, գնումների աջակցություն և այլն:
