ԱՄՆ-ում Հայաստանի դեսպան Տիգրան Սարգսյանը փետրվարի 25-ին հանդիպում է ունեցել Կոնգրեսում հայկական հարցերով հանձնախմբի նորանշանակ համանախագահ, Իլինոյս նահանգի հանրապետական կոնգրեսական Ռոբերտ Դոլդի հետ:
Արտգործնախարարության մամուլի ծառայության հաղորդմամբ` դեսպան Սարգսյանը շնորհավորել է կոնգրեսականին համանախագահությունը ստանձնելու կապակցությամբ և հաջողություն է մաղթել պարտականությունների իրականացման գործում:
Կողմերն անդրադարձել են հանձնախմբի գործունեության օրակարգին, հայ-ամերիկյան տնտեսական և քաղաքական հարաբերություններին, դրանց հետագա ընդլայնման ու ամրապնդման հեռանկարներին և այդ առումով հանձնախմբի դերակատարությանը: Տիգրան Սարգսյանը կարևորել է հայ-ամերիկյան հարաբերությունների ընդլայնման և խորացման անհրաժեշտությունը:
Դեսպանը ներկայացրել է Հայոց ցեղասպանության 100-րդ տարելիցին նվիրված միջոցառումների նախապատրաստական աշխատանքները: Կարևորվել է ԱՄՆ բարձր մակարդակով մասնակցությունը Հայաստանում և Սփյուռքում կազմակերպվող միջոցառումներին:
Հանդիպմանը քննարկվել են նաև տարածաշրջանին և միջազգային արդի խնդիրներ:
Հայաստանում ԱՄՆ նորանշանակ դեսպան Ռիչարդ Միլսը փետրվարի 13-ին Երևանում տված մամուլի ասուլիսին ասել էր, որ Վաշինգտոնում առայժմ հստակ որոշում կայացված չէ, թե Միացյալ Նահանգների կառավարությունից ով է Հայաստանում մասնակցելու Ցեղասպանության 100-րդ տարելիցին նվիրված միջոցառումներին: