ՀՀ նախագահ Սերժ Սարգսյանն այսօր ընդունել է իսրայելցի պատմաբան, ցեղասպանագետ Յաիր Աուրոնին: Նրան ուղեկցել է գրող, հրապարակախոս Զորի Բալայանը:
Նախագահի մամուլի ծառայության փոխանցմամբ, Սերժ Սարգսյանը ողջունել է հյուրին, ընդգծելով, որ ուրախ է Երևանում կրկին հանդիպելու հայ ժողովրդի լավագույն բարեկամներից մեկին: Սերժ Սարգսյանը կարևորել է հատկապես 2015թ.՝ Հայոց ցեղասպանության 100-րդ տարելիցի տարում, մեր ժողովրդի բարեկամների այցելությունները Հայաստան, նաև մասնակցությունը Ցեղասպանության անմեղ զոհերի հիշատակի ոգեկոչման արարողություններին:
Նախագահը շնորհակալություն է հայտնել իսրայելցի մտավորականին՝ Հայոց ցեղասպանության միջազգային ճանաչման և դատապարտման գործում իր անգնահատելի վաստակի, հայ ժողովրդի խնդիրներով մշտապես հետաքրքրվելու և օգտակար լինելու պատրաստակամության համար: Սերժ Սարգսյանը ողջունել է այս այցի շրջանակներում Յաիր Աուրոնի այցելությունը նաև Լեռնային Ղարաբաղի Հանրապետություն:
Յաիր Աուրոնը շնորհակալություն է հայտնել ջերմ խոսքերի համար և նշել, որ մեծապես տպավորված է Լեռնային Ղարաբաղով ու նրա խաղաղասեր և արժանապատիվ բնակիչներով: Նա ընդգծել է, թե Իսրայելում շատերը տեղյակ չեն Ղարաբաղի մասին և երբ իմանան ճշմարտությունը, ինչի ուղղությամբ ինքն արդեն սկսել է աշխատել, ապա, վստահաբար, կկանգնեն հայ ժողովրդի կողքին: Իսրայելցի պատմաբանը շեշտել է, թե համոզված է՝ երբ բարոյական պայքար ես մղում, պետք է հետևողական լինես այդ ճանապարհին: Նա վստահեցրել է, որ իր բազմաթիվ ընկերների հետ միասին շարունակելու է այդ պայքարը:
Մարտի 3-ին Յաիր Աուրոնը դասախոսություն կկարդա ՍիվիլՆեթում: Այն ՈՒՂԻՂ կհեռարձակվի ժամը 17:00-ից:
