Ադրբեջանի նախագահ Իլհամ Ալիևը մարտի 18-ին Նովրուզ Բայրամ տոնի կապակցությամբ 101 դատապարտյալի նկատմամբ համաներում հայտարարելու մասին հրամանագիր է ստորագրել: «Ազատություն» ռադիոկայանի ադրբեջանական ծառայության հաղորդմամբ ՝ համաներմամբ ազատ արձակվածների թվում են երկու քաղաբանտարկյալներ: Նրանցից մեկը երիտասարդ ակտիվիստ Օրհան Էյուբզադեն է, որը ձերբակալվել էր 2014թ. մայիսին երիտասարդական NIDA շարժման ակտիվիստների դատավճռի դեմ բողոքի ցույցին մասնակցության համար և դատապարտվել էր երեք տարի ազատազրկման՝ ոստիկանության նկատմամբ բռնության կիրառման մեղադրանքով: Մյուս քաղբանտարկյալը Բաշիր Սուլեյմանլին է, որը ձերբակալվել է 2014թ. մայիսին՝ Ընտրությունների մոնիթորինգի և ժողովրդավարության ուսումնասիրության կենտրոնի գործով և դատապարտվել 3,5 տարի ազատազրկման:
Հրամանագրով 90 դատապարտյալ ազատվում է հետագա ազատազրկումից, չորսը՝ ուղղիչ աշխատանքներից, յոթը՝ դրամական տուգանքներից:
Իրավապաշտպանների տվյալներով` ներկայում Ադրբեջանում քաղաքական դրդապատճառներով բանտերում է ավելի քան 100 քաղաքացի:
Միջազգային կազմակերպություններն ու ադրբեջանցի իրավապաշտպանները խիստ քննադատում են լրագրողների, բլոգերների, հրապարակախոսների և ընդդիմադիր հայացքներով հայտնի մարդկանց նկատմամբ հետապնդումները, որն իրականացվում է Ադրբեջանի իշխանությունների կողմից։
