Մի ժամանակաշրջանում, երբ Մերձավոր Արևելքի տարբեր անկյուններում գլուխ է բարձրացնում հակաքրիստոնեական բռնությունը, Պապի քայլը կարող է լինել ավելին, քան պարզապես պատմական հետաքրքրություն ներկայացնող փաստ:
Կաթոլիկ եկեղեցու կյանքը լուսաբանող Cruxnow.com կայքում լույս է տեսել Վատիկանի թղթակից Ինես Սան Մարտինի հոդվածը, որը վերնագրված է «Հռոմի պապը կվրդովեցնի Թուրքիային՝ հիշատակելով Հայոց ցեղասպանության զոհերին»:
Մարտինը գրում է, որ Հարության տոնից մեկ շաբաթ անց Հռոմի Ֆրանցիսկոս պապը հատուկ պատարագ կմատուցի Հայոց ցեղասպանության 100-րդ տարելիցի կապակցությամբ:
«Թուրքերի կողմից հայերի զանգվածային սպանդը երկու տարի առաջ Ֆրանցիսկոսը որակել էր որպես «արդի ժամանակաշրջանի առաջին ցեղասպանություն»»,- գրել է Վատիկանի թղթակիցը՝ նկատի ունենալով 2013թ. ամռանը Հռոմի պապ Ֆրանցիսկոսի՝ Հռոմում Հայոց կաթողիկե եկեղեցու առաջնորդ պատրիարք Ներսես Պետրոս 19-րդի գլխավորած պատվիրակության հետ հանդիպումը: Երբ պատվիրակության անդամներից մեկը նշել է, որ ինքը Ցեղասպանությունը վերապրածի ժառանգ է, Հռոմի պապն ի պատասխան ասել էր. «20-րդ դարի առաջին ցեղասպանությունը հենց հայերինն էր»: Այդպիսով` Պապը վերահաստատել էր ավելի վաղ արտահայտած իր դիրքորոշումը Հայոց ցեղասպանության ճանաչման վերաբերյալ. 2006թ. ապրիլին Ֆրանցիսկոս պապը` որպես կարդինալ Խորխե Մարիո Բերգոլյո, կոչ էր արել Թուրքիային առանց նախապայմանների ճանաչել Հայոց ցեղասպանությունը որպես հայ ժողովրդի և ամբողջ մարդկության դեմ գործած ծանր հանցագործություն:
«Մի ժամանակաշրջանում, երբ Մերձավոր Արևելքի տարբեր անկյուններում գլուխ է բարձրացնում հակաքրիստոնեական բռնությունը, Պապի քայլը կարող է լինել ավելին, քան պարզապես պատմական հետաքրքրություն ներկայացնող փաստ:
Ապրիլի 12-ին մատուցվելիք պատարագը մաս է հայերի մեծ արշավի, որի նպատակն է վառ պահել իրենց տառապանքի մասին հիշողությունը: Ապրիլի 23-ին՝ ժամը 19:15-ին, աշխարհի բոլոր եկեղեցիներում զանգեր կհնչեն: Ընտրված ժամը խորհրդանշում է 1915թ.: Զանգեր կհնչեն ամենուր, բացի Թուրքիայից, որտեղ դեռ գործող սակավաթիվ եկեղեցիները լուռ կմնան»,- ասված է հրապարակման մեջ:
Հոդվածագիրն այնուհետև անդրադառնում է Ֆրանցիսկոս պապի՝ անցյալ տարվա նոյեմբերին Թուրքիա կատարած այցին, որի ընթացքում, ինչպես նշում է Ինես Սան Մարտինը, նա հրապարակայնորեն չի հիշատակել Հայոց ցեղասպանությունը: Հոդվածի հեղինակն ընդգծում է, որ Ցեղասպանությունը չհիշատակելու մասին լրագրողներից մեկի հարցին ի պատասխան միայն Հռոմի պապն ասել էր, որ հույս ունի՝ կկատարվեն հաշտեցմանը միտված փոքր ժեստեր, ինչպես օրինակ՝ հայ-թուրքական սահմանի բացումն է:
2014թ. նոյեմբերին աշխարհի կաթոլիկների հոգևոր առաջնորդ Հռոմի Ֆրանցիսկոս պապը այցելել էր Թուրքիա: Վատիկան վերադարձի ճանապարհին պատասխանելով լրագրողների հարցերին՝ նա ասել էր. «Պետք է աղոթենք ժողովուրդների հաշտեցման համար: Հուսանք, որ կբռնենք փոքր ժեստերի, մերձեցմանը միտված փոքր քայլերի ճանապարհը»:
Նախատեսվում է, որ ապրիլի 12-ի պատարագին կմասնակցի Հայ կաթողիկե եկեղեցու առաջնորդ պատրիարք Ներսես Պետրոս 19-րդը, Ամենայն հայոց կաթողիկոս Գարեգին Բ-ն և Մեծի Տանն Կիլիկիո Արամ Ա կաթողիկոսը: