Պայքարում ենք էլեկտրաէներգիայի թանկացման դեմ: Թանկացում, որի պատճառը ոչ թե օբյեկտիվ տնտեսական իրողություններն են, այլ չարաշահումներն ու կոռուպցիան, պետության հանցավոր անտարբերությունը [մասնակցությունը], հանրային ծառայությունները կարգավորող մարմնի՝ անկախ որոշումներ ընդունելու իմպոտենցիան:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Պայքարում ենք կենսաթոշակային բարեփոխումների դեմ: Կառավարությունը հետ է կանգնում ռեֆորմից, ձևախեղում օրենքը: Ժողովրդագրական լուրջ խնդիրներ ունեցող երկրում կարևորագույն ռեֆորմը չի իրականացվում. կառավարությունը բավարար լեգիտիմություն չունի բարդ գործընթացը առաջ տանելու համար:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Պայքարում ենք հանրային տրանսպորտի թանկացման դեմ: Թանկացման փորձ, որի հետևում կանգնած էին քաղաքային (և ոչ միայն) իշխանության բարձր էշելոնները: Թանկացումը կանխվում է. քաղաքապետը բավարար լեգիտիմություն չունի ապացուցելու որոշման լեգիտիմությունը:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Պայքարում ենք Մաշտոցի պուրակը փրկելու համար: Պուրակում արմատակալած շահերը բախվում են հանրային շահին: Որոշումը չեղարկվում է ոչ թե օրենքների կամ ճարտարապետական ինչ-ինչ նորմերի հիման վրա, այլ «սիրուն չի»-ի սկզբունքով:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Պայքարում ենք կարմիր գծերի, տեսանկարահանող սարքերի դեմ: Դրանց հետևում իշխանության վերին էշելոնների արմատակալած շահերն են, որ հարստահարում են երկրի քաղաքացուն:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Պայքարում ենք, որ տխրահռչակ անձնավորությունը հայտնվել է ոչ թե բանտում, այլ մարզպետի պաշտոնում:
Պատճառը՝ կեղծվող ընտրություններ, դրա արդյունքում քաղաքական և պետական անկախ ինստիտուտների բացակայություն:
Այս շարքը երկար կարելի է շարունակել: Մենք պայքարում ենք հետևանքների դեմ: Պետք է պայքարել այդ հետևանքները ծնող պատճառների դեմ:
