Առաջիկա շաբաթ և կիրակի օրերին հայության հայացքն ուղղված է լինելու դեպի Լիբանան, դեպի Անթիլիաս` Մեծի Տանն Կիլիկիո կաթողիկոսություն:
Արամ Ա Վեհափառի առաջնորդությամբ և նախագահությամբ Միջերկրականի ափերին գտնվող այս երկրում սպասվում են չորս հիմնական եկեղեցական արարողություններ և ձեռնարկներ, որոնք Հայոց ցեղասպանության 100-րդ տարելիցի շրջանակներում կունենան համահայկական տարողություն, նշանակություն ու իմաստ:
Հուլիսի 18-ին Ջբեյլ կամ պատմական Բիբլոս քաղաքում տեղի կունենա Հայոց ցեղասպանության որբերի «Արամ Պէզիկեան» թանգարանի բացումը: Հայոց Մեծ եղեռնի այս թանգարանը գտնվում է «Թռչնոց բույնի» պատերի ներսում:
Ինչ է «Թռչնոց բույն»-ը:
Հայոց ցեղասպանությունից հետո այսօրվա Լիբանանը դարձավ փրկության ափ հազարավոր հայ որբերի համար: Դանիական, շվեյցարական, ամերիկյան և շվեդական մարդասիրական կազմակերպությունները հիմնեցին որբանոցներ ու օգնության կենտրոններ: «Թռչնոց բույն»-ը ամենամեծ որբանոցներից էր, որը հիմնադրել էին դանիացի միսիոներները: Այնտեղ է հազարավոր հայ որբերի կերակրել, գուրգուրել ու մեծացրել «մամա»-ն` դանիուհի Մարիա Ջակոբսոնը (Յակոբսոն), որի շիրիմը նաև ուխտավայր է Ջբեյլում և Հայոց ցեղասպանությունը խորհրդանշող վկայություններից մեկը:
Այսօր «Թռչնոց բույն»-ը տանիք է անապահով ընտանիքների և ծնողազուրկ երեխաների համար: 1972-ից ի վեր «Թռչնոց բույն»-ը և շրջակա տարածքները գտնվում են Մեծի Տանն Կիլիկիո կաթողիկոսության հաշվեկշռում: Տարածքում գտնվող որբանոցի շենքերից ամենահինը դառնում է Հայոց ցեղասպանության որբերի թանգարան: Այս աշխատանքի ֆինանսական մասը ստանձնել է Պէզիկեան ընտանիքը Շվեյցարիայից: Հենց բարերարներ Ալեքքո և Անի Պէզիկեան ամուսինների որդու` Արամի անունն է կրելու այդ թանգարանը:
Նույն օրը` հուլիսի 18-ի երեկոյան, Բիքֆայա բնակավայրում, որտեղ Անթիլիասի Դպրևանքն է, Սուրբ Աստվածածին վանքի տարածքում տեղի կունենա սրբալույս մյուռոնի օրհնության արարողություն, որի ընթացքում ներկաները կունկնդրեն Արամ Ա Վեհափառի ուղերձը:
Հուլիսի 19-ի առավոտյան Անթիլիասի Մայրավանքում` Սուրբ Գրիգոր Լուսավորիչ Մայր տաճարում, տեղի կունենա սուրբ և անմահ պատարագ, ջրօրհնեքի արարողություն ու միջեկեղեցական աղոթք: Էկումենիկ այս արարողությանը ներկա կլինեն Արևելյան Ուղղափառ եկեղեցիների բարձրագույն պետերը: Սպասվում է նաև Ռուս ուղղափառ եկեղեցու ներկայությունը:
Նույն օրը երեկոյան Բիքֆայայի վանքի պատերից ներս տեղի կունենա մշակութային երեկո: Հատուկ այդ նպատակով Բեյրութ են ժամանել աշխարհահռչակ երկու հայ մենակատարներ` սոպրանո Հասմիկ Պապյանը և տենոր Բարսեղ Թումանյանը: Պապյանին և Թումանյանին կընկերակցի Բեյրութի սիմֆոնիկ նվագախումբը ղեկավարությամբ մաեստրո Հարութ Ֆազլյանի:
Համերգի ավարտին ամփոփիչ խոսք կասի Մեծի Տանն Կիլիկիո կաթողիկոս Արամ Ա Վեհափառը:
