ԵԱՀԿ Մինսկի խումբը ծրագրում է սեպտեմբերին կազմակերպել Հայաստանի և Ադրբեջանի արտգործնախարարների հանդիպում՝ ՄԱԿ-ի գլխավոր ասամբլեայի նստաշրջանի շրջանակում: Այս մասին ադրբեջանական APA լրատվամիջոցին ասել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը:
APA – James Warlick: We need renewed commitment at highest level to finding peaceful resolution of conflict http://t.co/DHIDA1JXiP
— James Warlick (@AmbJamesWarlick) August 27, 2015
Նա նաև տեղեկացրել է, որ աշնանը ԵԱՀԿ Մինսկի խմբի համանախագահները մտադիր են տարածաշրջան այցելել, սակայն այցի հստակ ժամկետ դեռ չկա:
«Մինսկի խումբը ծրագրում է սեպտեմբերին ՄԱԿ-ի գլխավոր ասամբլեայի նստաշրջանի շրջանակում կազմակերպել Հայաստանի և Ադրբեջանի արտգործնախարարների հանդիպում և հակամարտությունը բանակցային ճանապարհով կարգավորելու վերաբերյալ տեսակետեր փոխանակել: Խաղաղ կարգավորման վերաբերյալ հանձնառությունները ամենաբարձր մակարդակով վերահաստատելու անհրաժեշտություն կա»,- ասել է ամերիկացի համանախագահը:
ՀՀ արտգործնախարարության խոսնակ Տիգրան Բալայանը, մեկնաբանելով Ուորլիքի՝ Ադրբեջանի և Հայաստանի արտաքին գերատեսչությունների ղեկավարների հնարավոր հանդիպման մասին հայտարարությունը, ՍիվիլՆեթին ասաց. «Նման հանդիպման կազմակերպման դեպքում մենք պատշաճ ժամկետներում կտեղեկացնենք»:
