ԵԱՀԿ Մինսկի խմբի ամերիկացի համանախագահ Ջեյմս Ուորլիքը մեկնել է Լոնդոն` մասնակցելու Լեռնային Ղարաբաղի հակամարտության հարցով խորհրդակցությունների: Այս մասին նա գրել է Թվիթերում:
«Այս գիշեր մեկնում եմ Լոնդոն` Բրիտանիայի արտաքին գործերի նախարարությունում ԼՂ հակամարտության խաղաղ կարգավորման հարցով խորհրդակցությունների համար»,- գրել է Ուորլիքը:
Headed to #London tonight for consultations with the British Foreign Office. #FCO #NKpeace
— James Warlick (@AmbJamesWarlick) January 11, 2016
***
2015թ. դեկտեմբերի 19-ին Բեռնում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը: Հանդիպմանը նախորդած օրերին ղարաբաղա-ադրբեջանական շփման գծում ադրբեջանական դիվերսիան հետ մղելիս զոհվել էր երեք հայ զինծառայող:
Հունվարի 9-ին հակառակորդի կրակից Արցախում զոհվել է ևս մեկ զինծառայող:
Հունվարի 10-ին Ալիևը հայտարարել է, որ 2015թ. Լեռնային Ղարաբաղի հակամարտության կարգավորման ուղղությամբ որևէ առաջընթաց չի գրանցվել, և նախագահների վերջին հանդիպումը ևս ֆորմալ բնույթ է կրել:
Տարեվերջին ՀՀ պաշտպանության նախարարի մամուլի խոսնակ Արծրուն Հովհաննիսյանը, Սիվիլնեթի հետ զրույցում խոսելով ռազմաքաղաքական նոր իրավիճակի մասին, ասել էր` «վերջին երկու տարիներն ապացուցում են, որ Ադրբեջանը մսխել է հայ-ադրբեջանական շփման գծում հաստատված հրադադարը, և սահմանին ներկայում սողացող պատերազմ է ընթանում»:
