Նրանք, ովքեր ժխտում են Ցեղասպանությունը, վախկոտներ են. Չեխիայի նախագահ

Մարդու ամենագլխավոր իրավունքը կյանքի իրավունքն է. Զեման

Նրանք, ովքեր ժխտում են Հայոց ցեղասպանությունը, հենց նրանք են, ովքեր ժխտում են հոլոքոստը. այդ մարդիկ պարզապես վախկոտներ են. երեկ հայտարարել է պետական այցով Հայաստանում գտնվող Չեխիայի նախագահ Միլոշ Զեմանը իր պատվին տրված պետական ընդունելության ժամանակ:

«Այսօր ճաշից հետո մի չեխ երիտասարդ լրագրող, ով ոչ բավականաչափ կյանքի փորձ ունի, ինձ հարցրեց, թե որտե՞ղ է ավարտվում ցեղասպանության սահմանը: Ես նրան պատասխանեցի՝ իմ երիտասարդ ընկեր, ես մեկ օրինակ եմ բերում՝ Եվրոպայում Համաշխարհային պատերազմի ժամանակ համակենտրոնացման ճամբարներում, գազային խցերում և այլն սպանվել է 6 մլն հրեա, բայց մի քանի հազար, հնարավոր է մի քանի տասնյակ հազար մնացել են: Եվ դուք ուզում եք ասել, որ դա ցեղասպանություն չէ՞, քանի որ մի քանի հազար մարդ մնացե՞լ է: Նույն բանը վերաբերում է հայ ժողովրդի ցեղասպանությանը: Որոշ մարդիկ ասում են՝ որոշները մնացել են, դա ցեղասպանություն չէ: Իսկական անհեթեթություն: Ես ուզում եմ ասել, որ մեզ միավորում է ճակատագիրը, քանի որ իմ ժողովուրդը դատապարտված կլիներ ցեղասպանության՝ նացիստական Գերմանիայի կողմից Համաշխարհային պատերազմում հաղթանակի դեպքում»,- նախագահականի մամուլի ծառայության փոխանցմամբ՝ ասել է Չեխիայի նախագահը՝ ընդգծելով, որ նրանք, ովքեր ժխտում են այդ ցեղասպանությունը, հենց նրանք են, ովքեր ժխտում են Հոլոքոստը:

Չեխիայի ղեկավարի խոսքով՝ մարդիկ, ովքեր դա ժխտում են, «պարզապես վախկոտներ են»:

«Ես երբեք, պարո՛ն Նախագահ, սիրալիր քաղաքական գործիչ չեմ եղել: Նրանք պարզապես վախկոտներ են: Խոսում են մարդու իրավունքների մասին. որոշ մարդկանց համար մարդու ամենագլխավոր իրավունքը ցույց անելն է կառավարության դեմ: Իմ դեմ էլ են ցույց արել, այլ գործիչների դեմ էլ, դա նորմալ է: Բայց դա մարդու ամենագլխավոր իրավունքը չէ: Մարդու ամենագլխավոր իրավունքը կյանքի իրավունքն է: Եվ բոլոր նրանք, ովքեր ժխտում են այդ իրավունքը, ոչ մի իրավունք չունեն խոսել մարդու այլ իրավունքների մասին: Ես ցանկանում եմ բաժակ բարձրացնել կյանքի իրավունքի համար»,- ընդունելության ժամանակ ասել է Միլոշ Զեմանը:

Մեկնաբանել