ԵԱՀԿ Մինսկի խմբի ամերիկացի համանախագահ Ջեյմս Ուորլիքը դեկտեմբերի 31-ին կթողնի համանախագահի իր պաշտոնը և կգործակցի ռուսական «Եգորով, Պուգինսկի, Աֆանասև և գործընկերներ» իրավաբանական ընկերության հետ։ Այս մասին նա հայտնել է Թվիթերի իր էջում։
«Ես կթողնեմ ԵԱՀԿ Մինսկի խմբի համանախագահի պաշտոնը դեկտեմբերի 31-ին։ Ինձ համար պատիվ է եղել աշխատել Պետդեպում ավելի քան 30 տարի»,- գրել է Ուորլիքը։
I will step down as @OSCE Co-Chair on December 31. It has been an honor to serve in the @StateDept for more than 30 years. #NKpeace
— James Warlick (@AmbJamesWarlick) November 21, 2016
Մեկ այլ թվիթում նա նշել է․ «Ես կգործակցեմ Ռուսաստանի ամենամեծ և ամենահեղինակավոր իրավաբանական ընկերության հետ»։
I will be a Partner in Russia’s largest and most prestigious law firm. https://t.co/KBS0ZCbUvR
— James Warlick (@AmbJamesWarlick) November 21, 2016
«Եգորով, Պուգինսկի, Աֆանասև և գործընկերներ»-ի հաղորդագրության համաձայն՝ Ջեյմս Ուորլիքը ընկերության Վաշինգտոնի թիմին կմիանա 2017թ․ հունվարին։ Նա պատասխանատու կլինի ԱՄՆ-ի և միջազգային հաճախորդների հետ աշխատանքի, ռազմավարական հաճախորդների հետ հարաբերությունների զարգացման, օրենսդրության և հանրային քաղաքականության համար։
Ուորլիքը Մինսկի խմբի ամերիկացի համանախագահն է 2013թ․ սեպտեմբերից։
«Եգորով, Պուգինսկի, Աֆանասև և գործընկերներ» իրավաբանական բյուրոն ստեղծվել է 1993թ․։ Համաձայն ընկերության կայքի՝ այն խոշորագույն իրավաբանական ընկերությունն է ԱՊՀ-ում, որը գրասենյակներ ունի Ռուսաստանում, Ուկրաինայում, Բելառուսում և ասոցացված գրասենյակներ՝ Մեծ Բրիտանիայում և ԱՄՆ-ում։
