Մինչև ձերբակալվելը ՌԴ էկոնոմիկայի նախկին նախարար Ալեքսեյ Ուլյուկաևը գործընկերների հետ մասնավոր զրույցներում առաջարկում էր կրճատել պետական վերահսկողությունը «Ռոսնեֆտ» ռուսաստանյան նավթագազային հսկայի հանդեպ․ այս մասին գրում է Reuters-ը՝ վկայակոչելով իր երկու աղբյուրները։
Դրանցից մեկը պատմել է, որ Ուլյուկաևն առաջարկում էր պետության մասնակցությունը «Ռոսնեֆտ»-ում նվազեցնել 50 տոկոսից ցածր։
Երկրորդ աղբյուրը հաստատել է, որ նախարարը մինչև ձերբակալությունը քննարկում էր այդ գաղափարը մյուս պաշտոնյաների հետ։
«Ուլյուկաևը շոշափում էր այդ թեման»,- ասել է աղբյուրը։
Reuters-ը շեշտում է, որ չկան որևէ ապացույցներ առ այն, որ Ուլյուկաևի ձերբակալությունը կապված է «Ռոսնեֆտ»-ի հարցում իր դիրքորոշման հետ։
Նոյեմբերի 28-ին Մոսկվայի քաղաքային դատարանը տնային կալանքի տակ էր թողել նախկին նախարարին, որը մեղադրվում է 2 մլն դոլարի չափով կաշառք վերցնելու մեջ։
Ուլյուկաևի գործի մասին ավելին՝ Կաշառք վերցնելու համար ձերբակալվել է ՌԴ տնտեսական զարգացման նախարարը:
