Հայաստանում գործող «Սինջար եզդիների ազգային միավորում» հասարակական կազմակերպության հիմնադիր, լրագրող Բորիս Մուրազիին երկու օր պահել են Ստամբուլի օդանավակայանում, ապա արտաքսել Հայաստան։
Դեկտեմբերի 1-ին Մուրազին Դիարբեքիրում պետք է մասնակցեր մի միջոցառման, և այնտեղ մեկնելու համար թռիչքը Ստամբուլով է եղել։
ՍիվիլՆեթի հետ զրույցում Մուրազին ասաց, որ ակնհայտորեն իրեն պահել են իր գործունեության հետ կապված։ «Դեկտեմբերի 1-ին Դիրաբեքիրում
Մեսոպոտոմիա հիմնադրամի բացումն էր։ Ֆեյսբուքս քրքրել են և տեսել, որ ես կապ եմ ունեցել HDP-ի [Թուրքիայում գործող ընդդիմադիր, քրդամետ Ժողովուրդների դեմոկրատական կուսակցության – խմբ․] որոշ գործիչների հետ, որոնցից մեկ-երկուսը ձերբակալված են»,- ասաց Մուրազին։
Նրա խոսքով՝ իրեն տվել են աբսուրդային բացատրություն. «Ասել են, որ շատ երիտասարդ եմ Թուրքիա մտնելու համար: Հետո, երբ Ֆեյսբուքով ընկերներիս էի գրում՝ հասկանալու համար ինչ կարող եմ անել, մոտեցան MIT-ի [Թուրքիայի հետախուզության] աշխատակիցներ, վերցրին հեռախոսս և սկսեցին ինչ-որ բան փնտրել։ Ինձ տարան հարցաքննության սենյակ, առգրավեցին համակարգիչս և հեռախոսս»,- ասաց Բորիս Մուրազին։
Մուրազիին երկու օր թույլ չեն տվել զանգահարել Հայաստան։ Օդանավակայանում, որտեղ նրան պահել են, հիմնականում եղել են արաբներ և մի քանի աֆրիկացիներ։ Մուրազիի խոսքով՝ նրանց մի մասին կասածում էին «Իսլամական պետության» հետ կապ ունենալու մեջ։ «Խնդիրներից խուսափելու համար արաբներին չեմ ներկայացել, որ ազգությամբ եզդի եմ։ Ներկայացել եմ որպես հայ»,- նշեց Բորիս Մուրազին։
Նա ասաց, որ երբ արդեն ինքնաթիռ պետք է նստեր Հայաստան վերադառնալու համար, իրեն մոտեցել է մի հայ տղա, ասել, որ իր խնդրով զբաղվել է «Հրանտ Դինք» հիմնադրամը։
