Եվրոպայում ՆԱՏՕ-ի Միացյալ ուժերի գերագույն հրամանատար, ամերիկյան գեներալ Քըրթիս Սկապարոտին հայտարարել է, որ Թուրքիայում հուլիսին ռազմական հեղաշրջման փորձից ի վեր Անկարան հետ է կանչել ՆԱՏՕ-ում իր 300-հոգանոց սպայական կազմի կեսին, հաղորդում է Wall Street Journal-ը։
Հետ կանչված սպաներից ոմանք հրաժարվել են վերադառնալ Թուրքիա և ապաստան են խնդրել Բելգիայում, Գերմանիայում, ԱՄՆ-ում և այլուր։
Թուրքիայի ղեկավարությունը իր սպաներին հետ է կանչում հեղաշրջման փորձի հետաքննության շրջանակում։
Հարցին, թե արդյոք կարծում է, որ թուրք զինվորականները կարող էին մասնակցել հեղաշրջման կազմակերպմանը, Սկապարոտին պատասխանել է, որ ոչ, նրանք «լավ են ծառայել ՆԱՏՕ-ում»։
«Նրանք այն սպաներն են, որոնք կառուցել են կարիերա և ունեն նշանակալի փորձ»,- լրագրողներին ասել է գեներալը։
Քըրթիս Սկապարոտին իր մտահոգությունն է հայտնել սպայական կազմի կրճատման առթիվ և հույս հայտնել, որ Թուրքիայի իշխանությունները կգործեն օրենքի շրջանակում և «իրենց մարդկանց կվերաբերվեն ինչպես հարկն է»։
