Ամերիկյան Tesla, Uber, PepsiCo ընկերությունների ղեկավարներ Էլոն Մասկը, Թրևիս Քալանիկը և Ինդրա Նույին համալրում են ԱՄՆ-ի ընտրված նախագահ Դոնալդ Թրամփի տնտեսական խորհրդատվական խորհրդի կազմը, հաղորդում է Business Insider-ը։
Uber’s Travis Kalanick and Elon Musk from SpaceX & Tesla will be joining Trump’s Strategic & Policy Forum, as well as Pepsi’s Indra Nooyi. pic.twitter.com/u9OR0dDJkt
— Chris Geidner (@chrisgeidner) December 14, 2016
Դեկտեմբերի սկզբին ստեղծված խորհրդի անդամները մատուցելու են տնտեսական խորհրդատվություն և հաճախ հանդիպելու են նախագահի հետ՝ իրենց հատուկ փորձն ու գիտելիքները կիսելու համար, քանի որ Թրամփը նախատեսում է իրագործել աշխատատեղեր վերստեղծելու և «Ամերիկան կրկին հզոր դարձնելու» նախագիծը։
Խորհուրդը գլխավորում է Blackstone ընկերության գործադիր տնօրեն Սթիվ Շվարցմենը։ Խորհրդի կազմի մեջ մտնում են ամերիկյան այլ խոշոր ընկերությունների ղեկավարներ՝ General Motors-ի, JPMorgan-ի, Disney-ի, Walmart -ի գործադիր տնօրենները։
Ամերիկյան տեխնոլոգիական հանրությունը նախընտրական փուլում դեմ էր Թրամփի թեկնածությանը՝ վերջինիս հակամիգրացիոն հռետորաբանությամբ պայմանավորված․ Սիլիկոնային հովիտը մեծապես հենվում է ներգաղթյալների աշխատուժի վրա։ Սակայն Թրամփի ցնցող հաղթանակից հետո ոլորտի ներկայացուցիչները Թրամփի հետ աշխատելու ուղիներ են փնտրում։
ԱՄՆ-ում նախագահական քարոզարշավի ժամանակ Էլոն Մասկը, որը նաև SpaceX ընկերության գործադիր տնօրենն է, սատարում էր Դեմոկրատական թեկնածու Հիլարի Քլինթոնին և քննադատում էր Թրամփին՝ ասելով, թե կարծում է՝ Թրամփը ճիշտ մարդը չէ նախագահի պաշտոնի համար։
Իր հերթին Uber-ի ղեկավարը հաճախ կատակում էր, որ Թրամփի հաղթանակի դեպքում կտեղափոխվի Չինաստան։
Ավելի վաղ հայտնի էր դարձել, որ ԱՄՆ պետքարտուղարի պաշտոնում Դոնալդ Թրամփն առաջադրել է ExxonMobil նավթագազային կորպորացիայի ղեկավար Ռեքս Թիլերսոնի թեկնածությունը։
