2017 թվականի մարտ ամսից Եվրասիական տնտեսական միության բոլոր երկրներում ծխախոտը կվաճառվի նոր՝ վախեցնող նկարներով, որոնք նախազգուշացնում են վտանգների ու վնասակար հետևանքների մասին։ Այս մասին հայտնում է ՌԻԱ Նովոստին՝ հղում տալով Եվրասիական տնտեսական հանձնաժողովին։
«2017-ի մարտի 17-ից ԵՏՄ երկրներում վաճառվող ծխախոտի տուփերի վրա «սարսափելի» պատկերներ կհայտնվեն։ Ըստ ԵվրԱզԷՍ-ի տեխնիկական կանոնակարգի` արտադրողները, ներկրողները և վաճառողները պետք է մինչ այդ ժամկետը` մոտ 3 ամսում, հասցնեն պատկերները տեղադրել տուփերի վրա»,-ասվում է ԵՏՄ հաղորդագրության մեջ։
Տուփերի վրա կպատկերվեն ծխելուց վնասված օրգանները, կնշվի հիվանդությունը` պարոդոնտոզից մինչև փտախտ ու քաղցկեղ։ Պատկերները կունենան աղտոտ շագանակագույն երանգ Pantone 448C կոդավորմամբ, որն ի դեպ, ըստ գիտնականների դա ամենատհաճ գույնն է։
«Նաև արգելվում է այնպիսի բան պատկերել կամ գրել տուփերի վրա, որը համեղ և օգտակար բան կհիշեցնի` միրգ, հատապտուղ և այլն։ Համարվում է, որ դա, կարող է մոլորեցնել ծխողներին, որոնք կարող են ծխախոտը ասոցացնել օգտակար մթերքի հետ։ Նույն պատճառով չի կարելի նաև նշել նիկոտինի, խեժի քանակը` ծխողները չպետք է կարծեն, որ որքան քիչ է վնասակար նյութերի քանակն, այնքան անվնաս է արտադրանքը»,- նշվում է հաղորդագրության մեջ։
Որոշումն ամբողջովին ուժի մեջ կմտնի նոյեմբերի կեսից, իսկ ոչ այնքան «սասափելի» պատկերներով ապրանքը կթույլատրվի վաճառել ԵՏՄ այն երկրում, որտեղ այն արտադրվել է։
Հայաստանի Հանրապետությունը 2004 թվականի հոկտեմբերի 12-ին միացել է Առողջապահության համաշխարհային կազմակերպության «Ծխախոտի դեմ պայքարի մասին» շրջանակային կոնվենցիային, որը նպատակ ունի ներկա և ապագա սերունդներին պաշտպանել մարդկանց առողջության համար ծխախոտի օգտագործման և ծխախոտի ծխի ազդեցության քայքայիչ հետևանքներից: Այս մասին հայտնում է առողջապահության նախարարությունը։
Կոնվենցիային միանալուց ի վեր Հայաստանում տղամարդկանց շրջանում ծխողների թիվը նվազել է 8-10%-ով:
