ՊՆ մամուլի խոսնակ Արծրուն Հովհաննիսյանը իր ֆեյսբուքյան էջում տեղեկացնում է, որ այսուհետ ուսման զեղչերից կկարողանան օգտվել նաև 2016-ի ապրիլյան պատերազմի մարտական գործողություններին չմասնակցած, բայց մարտական հերթապահություն իրականացրած զինծառայողները։
«ՀՀ պաշտպանության նախարարության և Հայաստանի երիտասարդական հիմնադրամի միջև ձեռք է բերվել համաձայնություն, ըստ որի՝ 2016թ. ապրիլյան պատերազմի ժամանակահատվածում միայն մարտական հերթապահության մեջ ընդգրկված զինծառայողները, որոնք մարտական գործողություններին չեն մասնակցել և արդեն զորացրվել են, ՀՀ բուհերում սովորելիս կարող են օգտվել լրացուցիչ 20 տոկոս զեղչից։ Ըստ պայմանավորվածության՝ զեղչի գումարը կհատկացվի Հայաստանի երիտասարդական հիմնադրամի կողմից, ինչը կգումարվի սահմանված 30 տոկոս զեղչին՝ ընդհանուր կազմելով 50 տոկոս։
Այսպիսով կլուծվեն որոշ զինծառայողների զինգրքույկներում կատարված գրանցումների մասնավոր սխալների հարցը, ինչպես նաև մարտական հերթապահության և մարտական գործողությունների հետ կապված տարբերությունների խնդիրները։ Փաստաթղթերի ընդունման վերջնաժամկետը՝ մարտի 24-ը:
2017-ի ձմեռը զորացրված զինծառայողների մի մասի զինգրքույկներում ապրիլյան պատերազմի մարտական գործողությունների մասնակից լինելու գրառումները զինվորական կոմիսարիատներում ջնջել էին և «անվավեր» ճանաչել։ ԼՂՀ ՊՆ-ն «անվավեր» նշումները մեկնաբանել էր որպես «որոշ պաշտոնատար անձանց անփութության արդյունքում թույլ տված վրիպակ»։
