2016թ․` 2006-ից ի վեր առաջին անգամ, Ադրբեջանը գազ է ներմուծել (294 մլն խորանարդ մետր): Թուրքմենստանը նրա միակ մատակարարն է:
Ինչպես հաղորդում է էներգետիկ ոլորտի հետազոտություններով զբաղվող ֆրանսիական Petrostrategies ընկերության World Energy Weekly հանդեսը (մարտի 13-ի համարը), Ադրբեջանի առևտրային գազի արդյունահանման ծավալը 2016թ․ նվազել է մինչև 18.75 մլրդ խմ՝ 2015թ․ 19.44 մլրդ խմ-ի համեմատ։ Արտահանումը կազմել է ընդհանուր առմամբ 8.06 մլրդ խմ՝ 2015 թ. 8.14 մլրդ խմ-ի համեմատ։
Թուրքմենստանի և Իրանի միջև 2016թ․ հոկտեմբերին կնքված փոխանակման համաձայնագրով՝ Իրանը տեղափոխում է թուրքմենական գազը իր հյուսիսային տարածքներ, ինչպես նաև Ադրբեջան: 
Ըստ Petrostrategies-ի՝ Ադրբեջանում նվազել է նավթի արդյունահանումը։ «Ազերի-Չիրագ-Գյունեշլի» հանքավայրերում, որի շահագործման միջազգային կոնսորցիումը ղեկավարում է British Petroleum-ը, 2016թ․ արդյունահանվել է օրական 630 000 բարել նավթ՝ 2015թ․ 634 000-ի համեմատ։
2016թ․ Ադրբեջանի նավթի ընդհանուր արդյունահանումը կազմել է 41.03 մլն տոննա, մինչդեռ 2015 թ. այն կազմել էր 41.7 մլն տոննա։
Մյուս կողմից, «Շահ-Դենիզ» հանքավայրի գազի արտադրությունը 2015թ․ 9.9 մլրդ խմ-ից աճել է 10,7 մլրդ խմ 2016թ.։ Ընդհանուր առմամբ, Ադրբեջանը 2016թ․ արդյունահանել է 29.33 մլրդ խմ գազ՝ 2015թ․ 29.72 մլրդ խմ-ի համեմատ։
Ստորև տեսանյութում Petrostrategies ընկերության տնօրեն Պետրոս Թերզյանը վերլուծում է Ադրբեջանի վարքագիծը՝ նվազող նավթային եկամուտների և տնտեսական դժվարությունների պատկերին: Զրույցը տեղի է ունեցել 2016թ․ ապրիլի 6-ին։
