Թուրքիան անընդունելի է համարում ԱՄՆ-ի այն հայտարարությունը, թե Վաշինգտոնը զենք ու ռազմական տեխնիկա կմատակարարի Սիրիայում «Իսլամական պետության» դեմ կռվող քրդական «Ժողովրդական պաշտպանության ուժերին» (YPG):
Ինչպես հաղորդում է AFP գործակալությունը, Թուրքիայի փոխվարչապետը Նուրեթթին Ջանիքլին ասել է, որ YPG-ին զինելն «անընդունելի է»։
«Մենք ակնկալում ենք, որ այս սխալը կուղղվի»,- ասել է Ջանիքլին Վաշինգտոնում Թուրքիայի և ԱՄՆ-ի նախագահների հանդիպման նախաշեմին։
Թուրքիայի արտաքին գործերի նախարար Մևլութ Չավուշօղլուն նույնպես մեկնաբանել է Վաշինգտոնից ստացված տեղեկությունը․ «YPG-ի կողմից ստացված յուրաքանչյուր զենք սպառնում է Թուրքիային»։ Նա կրկնել է պաշտոնական Անկարայի այն թեզը, թե քրդական այդ կազմակերպությունը «ահաբեկչական է և չի տարբերվում Քրդստանի աշխատավորական կուսակցությունից՝ PKK-ից», որը Թուրքիայում պաշտոնապես հռչակված է ահաբեկչական։
Երկուշաբթի օրը ԱՄՆ-ի նախագահ Դոնալդ Թրամփը, ինչպես հայտարարել է Պենտագոնի խոսնակ Դանա Ուայթը, հավանություն է տվել Սիրիայի քրդերին զինելու նախագծին, այնպես որ նրանք կարողանան մասնակցել «Իսլամական պետություն»-ից Ռաքքան «մոտ ապագայում» ազատագրելու պայքարին։
Ուայթը հավելել է, որ «ԱՄՆ-ը քայլեր կձեռնարկի»՝ ապահովելու, որ Թուրքիան չառերեսվի հավելյալ անվտանգության ռիսկերի»։
Ինչպես նշում է New York Times-ը, ամերիկացի հրամանատարները երկար ժամանակ է՝ հանդես են գալիս YPG-ին և Սիրիայի արաբական ուժերին զինելու օգտին՝ դա համարելով ԻՊ-ից Ռաքքան ազատագրելու ամենաարագ ուղին։
ԱՄՆ-ի այս քաղաքականությանը դեմ է ՆԱՏՕ-ի նրա դաշնակից Թուրքիան, որը քրդական կազմակերպությունը համարում է Թուրքիայում գործող ահաբեկչական PKK-ի ճյուղ։
ԱՄՆ-ի հայտարարությունը հնչել է հաջորդ շաբաթ Վաշինգտոնում Թրամփի և Էրդողանի՝ որպես ԱՄՆ-ի և Թուրքիայի նախագահներ առաջին հանդիպումից առաջ։
