Ավան և Նոր Նորք վարչական շրջանների ընդհանուր իրավասության դատարանում շարունակվում է «Սասնա ծռերի» 18 անդամների գործով դատավարությունը։
16:38
Փաստաբաններ Դավիթ Գյուրջյանի, Երվանդ Վարոսյանի, Լուսինե Սահակյանի, Արայիկ Պապիկյանի, Գրիշա Բալասանյանի, Մուշեղ Շուշանյանի նկատմամբ կիրառվեց սանկցիա` պատասխանատվության ենթարկելու համար դիմելով փաստաբանական պալատ:
Հաշվի առնելով այն հանգամանքը, որ փաստաբանները ներկա չեն նիստին, առանց նրանց նիստը չի շարունկվում:
Դատական նիստը հետաձգվեց, հաջորդ նիստը կկայանա հուլիսի 20-ին, ժամը 11:00-ին:
15:04
Ամբաստանյալներ Տիգրան Մանուկյանի և Թաթուլ Թամրազյանի փաստաբան Մոնիկա Մարգարյանի նկատմամբ կիրառվեց սանկցիա` պատասխանատվության ենթարկելու համար դիմելով փաստաբանական պալատ:
Դատարանն ընթերցեց կարգադրիչի արձանագրությունն առ այն, որ փաստաբան Մուշեղ Շուշանյանը թույլ չի տվել ստուգելու գրպանի միջի պարունակությունը, որը զննման ժամանակ ազդանշան է տվել:
Նիստերի դահլիճ չեն ներկայացել փաստաբաններ Դավիթ Գյուրջյանը, Երվանդ Վարոսյանը, Լուսինե Սահակյանը, Արայիկ Պապիկյանը և Գրիշա Բալասանյանը: Նրանք դիմում են ներկայացրել, որ հրաժարվում են մասնակցել դատական նիստին:
Դատարանը հեռացավ խորհրդակցական սենյակ` վերջիններիս վարքագծի վերաբերյալ համապատասխան որոշում կայացնելու:
14:04
Թաթուլ Թամրազյանի փաստաբան Մոնիկա Մարգարյանը դատարանին տեղեկացրեց, որ իր պաշտպանյալը արգելել է, առանց իր ներկայության գտնվել նիստերի դահլիճում և մասնակցել գործի քննությանը: Ամբաստանյալներից Տիգրան Մանուկյանը ևս հայտարարեց, որ առանց իր ներկայության փաստաբան Մոնիկա Մարգարյանը չպետք է գտնվի նիստերի դահլիճում:
Դատավորն արգելեց փաստաբանին լքել նիստերի դահլիճը, սակայն փաստաբանը ինքնակամ դուրս եկավ: Դատարանը հեռացավ խորհրդակցական սենյակ` պաշտպանի վարքագծի վերաբերյալ որոշում կայացնելու:
13:58
Ամբաստանյալներ Արայիկ Հակոբյանի և Մարտիրոս Հակոբյանի փաստաբան Լուսինե Սահակյանի նկատմամբ կիրառվեց երկրորդ սանկցիան` պատասխանատվության ենթարկելու համար դիմելով փաստաբանական պալատ:
Դատավոր Արտուշ Գաբրելյանը փորձում էր ճշտել ամբաստանյալ Թաթուլ Թամրազյանի ինքնությունը, սակայն վերջինս նշեց, որ եթե նիստերի դահլիճում չլինեն իրենց բոլոր ընկերները, ապա ինքն էլ չի մասնակցի նիստին և չի պատասխանի որևէ հարցի:
Վերջինս չպատասխանեց դատավորի հարցերին, դատարանը նրա նկատմամբ կիրառեց նախազգուշական, ապա 6 ժամով նիստերի դահլիճից հեռացնելու սանկցիա:
12:38
Ամբաստանյալներ Արայիկ Հակոբյանի և Մարտիրոս Հակոբյանի փաստաբան Լուսինե Սահակյանի նկատմամբ կիրառվեց սանկցիա` պատասխանատվության ենթարկելու համար դիմելով փաստաբանական պալատ:
«Հենց նոր ինձ տեղեկացրեցին, որ ամբաստանյալ Սերգեյ Կյուրեղյանին դատարան տեղափոխելու ընթացքում` խուց տեղափոխելիս ստացել է գլխի վնասվածք: Ես խնդրում եմ այդ հարցի պարզաբանման համար նիստերի դահլիճ հրավիրել Սերգեյ Կյուրեղյանին»,- ասաց դատավոր Արտուշ Գաբրելյանը:
Կազմվել է արձանագրություն, առ այն, որ մեքենայից իջեցնելուց և խուց ուղեկցելու ժամանակ Կյուրեղյանը գլուխը պատահաբար խփել է մուտքի ծածկի տակ ամրացված երկաթյա ամրակին և ճակատային մասում ստացել է վնասվածք:
Կյուրեղյանին նիստերի դահլիճ բերեցին և նա փաստեց, որ դեպքը պատահաբար է տեղի ունեցել:
Փաստաբան Լուսինե Սահակյանը կրկին ուզում էր միջնորդություն ներկայացնել, սակայն դատավորը թույլ չտվեց: Սահակյանը շարունակեց, ասելով, որ չի վախենում սանկցիաներից և պետք է միջնորդություն ներկայացնի, դատարանը հայտարարեց, որ գնում է խորհրդակցական սենյակ` փաստաբանի վարքագծի վերաբերյալ որոշում կայացնելու:
12:25
«Սասնա ծռեր» խմբի անդամ Թաթուլ Թամրազյանի փաստաբան Մոնիկա Մարգարյանին թույլ տվեցին մտնել նիստերի դահլիճ` պայուսակը բացելուց և համոզվելուց հետո, որ մեջը մետաղական իր չկա:
12:06
Այսօր «Սասնա ծռերի»-ից Արամ Մանուկյանի ծննդյան օրն է: Նիստերի դահլիճ մտնելու ժամանակ խմբի համակիրները վանկարկում էին «շնորհավոր»:
11:38
Փաստաբանները չեն կարողանում ներկայանալ դատական նիստին, քանի որ նախօրոք պայմանավորվածություններ ունեն այլ դատարանների հետ: Դատարանը նրանց բացակայությունը համարեց անհարգելի: Փաստաբան Լուսինե Սահակյանը ցանկացավ միջնորդություն ներկայացնել, սակայն դատավորը թույլ չտվեց:
Փաստաբան Սահակյանը պնդեց, որ իր իրավունքն է միջնորդություն ներկայացնելը, ինչից հետո դատավոր Արտուշ Գաբրիելյանը սկզբից կիրառեց նախազգուշական սանկցիա, իսկ հետո հեռացավ խորհրդակցական սենյակ` փաստաբանի վարքագծի հետ կապված համապատասխան որոշում կայացնելու: Նիստն ընդմիջվեց:
11:04
Դատավոր Արտուշ Գաբրիելյանը նիստը հետաձգեց 15 րոպեով, որպեսզի բոլոր ամբաստանյալները ներկա գտնվեն դատական նիստին:
