Լեռնային Ղարաբաղի նախագահ Բակո Սահակյանը հրամանագիր է ստորագրել կառավարության կառուցվածքը սահմանելու մասին։ Նախկին վարչապետ Արայիկ Հարությունյանը, ըստ նոր կառուցվածքի, նշանակվել է պետական նախարար։ Վարչապետի պաշտոնը, ըստ Լեռնային Ղարաբաղի նոր սահմանադրության, վերացվել է։ Արտաքին գործերի նախարար է նշանակվել Մասիս Մայիլյանը։
Լեռնային Ղարաբաղի կառավարությունն այժմ ունի հետևյալ կառուցվածքը.
պետական նախարար,
առողջապահության նախարարություն,
արդարադատության նախարարություն,
արտաքին գործերի նախարարություն,
աշխատանքի, սոցիալական հարցերի և վերաբնակեցման նախարարություն,
բնապահպանության և բնական ռեսուրսների նախարարություն,
գյուղատնտեսության նախարարություն,
էկոնոմիկայի և արտադրական ենթակառուցվածքների նախարարություն,
կրթության, գիտության և սպորտի նախարարություն,
մշակույթի, երիտասարդության հարցերի և զբոսաշրջության նախարարություն,
պաշտպանության նախարարություն,
քաղաքաշինության նախարարություն,
ֆինանսների նախարարություն:
Բակո Սահակյանի հրամանագրով սահմանվել են նաև պետական կառավարման այլ մարմիններ.
ազգային անվտանգության ծառայություն,
ոստիկանություն,
արտակարգ իրավիճակների պետական ծառայություն:
ԼՂ նախագահի հրամանագրով նշանակվել են.
պետական նախարար՝ Արայիկ Հարությունյանը,
առողջապահության նախարար՝ Կարինե Աթայանը,
արդարադատության նախարար՝ Արարատ Դանիելյանը,
արտաքին գործերի նախարար՝ Մասիս Մայիլյանը,
աշխատանքի, սոցիալական հարցերի և վերաբնակեցման նախարար՝
Սամվել Ավանեսյանը,
բնապահպանության և բնական ռեսուրսների նախարար՝ Վազգեն Միքայելյանը,
գյուղատնտեսության նախարար՝ Ժիրայր Միրզոյանը,
էկոնոմիկայի և արտադրական ենթակառուցվածքների նախարար՝
Լևոն Գրիգորյանը,
կրթության, գիտության և սպորտի նախարար՝ Նարինե Աղաբալյանը,
մշակույթի, երիտասարդության հարցերի և զբոսաշրջության նախարար՝
Սերգեյ Շահվերդյանը,
պաշտպանության նախարար՝ Լևոն Մնացականյանը,
քաղաքաշինության նախարար՝ Կարեն Շահրամանյանը,
ֆինանսների նախարար՝ Գրիգորի Մարտիրոսյանը:
Ըստ ԼՂՀ նախագահի հրամանագրերի՝ սահմանվել են այն նախարարների կազմը, որոնց գործունեությունը համակարգվելու է պետական նախարարի կողմից, ինչպես նաև՝ պետական սեփականության և ֆինանսների կառավարման ոլորտում Նախագահի կողմից պետական նախարարին վերապահված լիազորությունների շրջանակը:
Բակո Սահակյանի մեկ այլ հրամանագրի համաձայն՝ տեղի են ունեցել մի շարք կառուցվածքային փոփոխություններ, մասնավորապես.
Էկոնոմիկայի և արտադրական ենթակառուցվածքների նախարարությունից առանձնացվել է զբոսաշրջության վարչությունը և ընդգրկվել մշակույթի, երիտասարդության հարցերի և զբոսաշրջության նախարարություն կազմում:
Նախագահի աշխատակազմի կառուցվածքում ստեղծվել է «Կառավարության գործերի կառավարչություն» առանձնացված ստորաբաժանում, որը նախկին կառավարության աշխատակազմի իրավահաջորդն է:
Նախկին կառավարության աշխատակազմի որոշ ստորաբաժանումներ ընդգրկվել են տարբեր մարմինների կազմում.
Պետական նախարարի աշխատակազմում են ընդգրկվել սոցիալ-տնտեսական վարչությունը, ինչպես նաև տարածքային կառավարման բնագավառում գործառույթներ իրականացնող ստորաբաժանումները:
Էկոնոմիկայի և արտադրական ենթակառուցվածքների նախարարության կառուցվածքում են ընդգրկվել անշարժ գույքի կադաստրի և պետական գույքի կառավարման վարչությունները, գեոդեզիայի և հողային պետական տեսչությունը:
Աշխատանքի, սոցիալական հարցերի և վերաբնակեցման նախարարության կառուցվածքում են ընդգրկվել բնակարանային հարցերի վարչությունը, վերաբնակեցման և միգրացիայի բաժինը:
Նոր գործառույթներին համապատասխան՝ հաստատվել են Նախագահի աշխատակազմի, ինչպես նաև Նախագահի աշխատակազմի «Կառավարության գործերի կառավարչություն» առանձնացված ստորաբաժանման կանոնադրությունները և կառուցվածքները:
Նախագահի մեկ այլ հրամանագրով սահմանվել է կառավարության գործունեության կազմակերպման նոր կարգ:
Նույն օրը Նախագահն ստորագրել է հրամանագրեր, համաձայն որոնց՝ Նախագահի աշխատակազմի ղեկավարի տեղակալ Արայիկ Լազարյանը նշանակվել է Նախագահի աշխատակազմի կառավարության գործերի կառավարչության պետ-աշխատակազմի ղեկավարի առաջին տեղակալ: Արդարադատության նախարարի տեղակալ Կարեն Դանիելյանը նշանակվել է Նախագահի աշխատակազմի ղեկավարի տեղակալ-պետաիրավական վարչության պետ: