Ուկրաինայի արտաքին գործերի նախարար Պավել Կլիմկինն այսօր Բաքվում կարծիք է հայտնել, որ Ադրբեջանը օկուպացիայի զոհ է․ այս մասին նա հայտարարել է ադրբեջանցի իր պաշտոնակից Էլմար Մամեդյարովի հետ համատեղ մամուլի ասուլիսին։
MFA’s @PavloKlimkin and Elmar #Mammadyarov press conf in #Baku. The meeting confirmed the parties’ willingness to deepen the dialogue pic.twitter.com/VAOcnGbhvc
— UKR Embassy in AZE (@UKRinAZE) October 3, 2017
Կլիմկինը շեշտել է Ադրբեջանի ու Ուկրաինայի փոխադարձ աջակցությունը միմյանց ինքնիշխանությանը և տարածքային ամբողջականությանը։
«Մենք մեր ընկերներին հասկանում ենք բոլորից լավ։ Խոսքը գնում է մարդկանց տառապանքների, օկուպացիայի մասին»,- ղարաբաղյան հակամարտության մասով ասել է Կլիմկինը։
Պաշտոնական Կիևը բազմիցս է հանդես եկել Ադրբեջանի օգտին ԼՂ հակամարտության համատեքստում։ Կլիմկինի հայտարարությունը, սակայն, բաց մեղադրանք է Հայաստանի հասցեին։
2016թ․ հուլիսին Բաքու կատարած այցի ժամանակ Ուկրաինայի նախագահ Պետրո Պորոշենկոն «անընդունելի» էր համարել Լեռնային Ղարաբաղում ստատուս քվոյի պահպանումը։
Այս տարվա փետրվարին Ուկրաինան և Ադրբեջանը պայմանավորվել էին թույլ չտալ այն ապրանքների մուտքը, որոնք արտադրված են Բաքվի և Կիևի վերահսկողությունից դուրս գտնվող տարածքներում։
Ադրբեջանում Ուկրաինայի դեսպան Ալեքսանդր Միշչենկոն պարզաբանել էր, որ Լեռնային Ղարաբաղում արտադրվող ապրանքները կարող են Ուկրաինայի սահմանը հատել միայն Բաքվի հավանությամբ։ Նմանատիպ սխեմա է կիրառում նաև Ադրբեջանը Դոնբասից եկող ապրանքների համար։
Ստելլա Մեհրաբեկյան
