Այս տարվա մարտի 28-ից մինչև հոկտեմբերի 20-ը Շենգեն գոտու երկրներ է այցելել Վրաստանի մոտ 162 հազար քաղաքացի, որոնցից մոտ 10 հազարը չի վերադարձել։ Այսպիսի տվյալներ է հրապարակել Վրաստանի եվրոպական և եվրաատլանտյան ինտեգրման նախարարությունը, ըստ Agenda կայքի։
Գերատեսչությունը չի հստակեցրել, թե 10 հազար քաղաքացիներից քանիսն է մնացել Շենգեն գոտում և քանիսը՝ մեկնել երրորդ երկրներ։
Վրաստանցի այցելուներից մոտ 30 հազարը 31-40 տարեկան են։ Մոտ 62 հազարը՝ կին, 54 հազարը՝ տղամարդ։
***
Անցյալ շաբաթ հայտնի էր դարձել, որ Եվրախորհրդարանի՝ քաղաքացիական ազատությունների, արդարադատության և ներքին գործերի հարցերով հանձնաժողովը (LIBE) հավանություն է տվել նախաձեռնությանը, որով Վրաստանի քաղաքացիների համար շենգենյան գոտի մեկնելուց առաջ սահմանվում է «նախնական թույլտվության» մեխանիզմ։ Թեև պաշտոնական Թբիլիսին հայտարարում է, որ նոր մեխանիզմը միայն կհեշտացնի քաղաքացիների մուտքը Եվրոպա, վերլուծաբանները հակված են մտածելու, որ այդկերպ ԵՄ-ն փորձում է կանխել Վրաստանից ապօրինի ներգաղթյալների հոսքը։
Եվրամիությունը շտկում է Վրաստանի հետ անայցագիր ռեժիմը։
Այս տարվա մարտի 28-ին ուժի մեջ է մտել Եվրամիության և Վրաստանի միջև անայցագիր ռեժիմը։ Կենսաչափական անձնագրեր ունեցող Վրաստանի քաղաքացիներն այսուհետև կարող են առանց այցագրի շենգենյան գոտու երկրներ մուտք գործել և ընդհանուր առմամբ մնալ 90 օր՝ 180 օրվա կտրվածքով։
