Իրանում ՀՀ դեսպան Արտաշես Թումանյանն այսօր հանդիպել է Իրանի կապի տեղեկատվական տեխնոլոգիաների նախարար Մոհամադ Ջավադ Ազարի Ջահրոմին, այս մասին հաղորդում է արտաքին գործերի նախարարությունը:
Դեսպան Թումանյանը ցավակցություն է հայտնել նախօրեին Իրանի արևմուտքում տեղի ունեցած ավերիչ երկրաշարժի զոհերի կապակցությամբ:
«Զրուցակիցները քննարկել են նաև հեռահաղորդակցության և տեղեկատվական տեխնոլոգիաների բնագավառում հայ-իրանական համագործակցության խնդիրները:
Հաշվի առնելով համատեղ իրականացվող ծրագրերը՝ կողմերը նշել են, որ երկու երկրներն էլ ունեն մեծ ներուժ և համագործակցության լայն հնարավորություններ:
ՀՀ դեսպանն առաջարկել է քննարկել տեղեկատվական տեխնոլոգիաների ոլորտի հայկական և իրանական ընկերությունների մասնակցությամբ 2018թ. Թեհրանում գործարար համաժողով անցկացնելու հարցը:
Նախարար Ջահրոմիի կողմից վերը նշված առաջարկությունը հավանության է արժանացել և վերջինս պատրաստակամություն է հայտնել աջակցել դրա կազմակերպմանը»,- ասվում է հաղորդագրությունում: