«Համշենուհի» համշենահայերի կանանց միջազգային միությունը, որի առաքելությունն է կանանց իրավունքների, հայ ժողովրդի նկատմամբ նրա բնօրրան Արևմտյան Հայաստանում՝ Համշենում, իրականացված ցեղասպանության ճանաչումն ու դատապարտումը, ինչպես նաև մյուս բնիկ ժողովուրդների իրավունքների պաշտպանությունը, դիմել է Նոբելյան հանձնաժողովին՝ Թուրքիայի խորհրդարանաի հայազգի պատգամավոր, «Ժողովուրդների դեմոկրատական կուսակցութան» (HDP) անդամ Կարո Փայլանին Խաղաղության Նոբելյան մրցանակ շնորհելու առաջարկով։
Կազմակերպության հայտարարությունում Փայլանը բնութագրվում է որպես մարդ, որն «իր ամբողջ կյանքը նվիրել է հայ և մյուս բնիկ ժողովուրդների իրավունքների պաշտպանության գործին»։
«Այսօր նա այն քչերից է, ով պատասխանատվություն է վերցրել պաշտպանելու մարդասիրական իրավունքները, բնիկներին, ազգային ու կրոնական փոքրամասնություններին: Նրա կողմից ցանված խաղաղության սերմերը՝ տարբեր ազգությունների ու դավանանքների պատկանող մարդկանց միջև հանդուրժողականության ու փոխըմբռնման վերաբերյալ, տալիս են դրական արդյունքներ Թուրքիայի Հանրապետության հանրության մեջ»:
Կազմակերպությունը կոչ է անում «բարի կամքի տեր բոլոր մարդկանց», կանանց իրավունքների, ինչպես նաև մարդու իրավունքների պաշտպան բոլոր կազմակերպություններին ու միություններին միանալ իրենց նախաձեռնությանը և ձայնը տալ Կարո Փայլանին:
Հայտարարության հեղինակները հիշեցնում են, որ հայտ ներկայացնելու ժամանակը խիստ սահմանափակ է՝ 2018թ. հունվարի 30։