Հայաստանի խորհրդարանականները Վաշինգտոնում են

Հայաստանի խորհրդարանական պատվիրակությունը Միացյալ Նահանգներում է։ 

Ինչպես հաղորդում է «Ամերիկայի ձայնը», պատվիրակության ղեկավար, Հայաստանի ԱԺ փոխնախագահ Արփինե Հովհաննիսյանը հայտարարել է, որ Հայաստանն ու Միացյալ Նահանգները հնարավորություն են ստացել կերտելու երկկողմ հարաբերությունների նոր պատմություն։

«Ձեզ հետ միասին մենք հնարավորություն ենք ստացել կերտելու նոր պատմություն՝ մեր պատմական ժառանգության, մեր ոգու հիման վրա: Մենք ունենք շատ լավ հիմք հայ-ամերիկյան հարաբերությունների նոր պատմություն կերտելու համար»:

ԱՄՆ-ի կոնգրեսականներն իրենց կողմից հայկական կողմին հավաստիացնում են՝ Միացյալ Նահանգները շարունակելու է աջակցել Հայաստանին.

«Մենք ցանկանում ենք օգնել Հայաստանին 21-րդ դարում հաջողության հասնել», – նշում է Կոնգրեսում հայ-ամերիկյան բարեկամության խմբի համանախագահ Ջեքի Սփիրը:

Հայաստանի նման բարեկամների հետ Միացյալ Նահանգներին պետք է զարգացնել հարաբերությունները, շարունակում է Հայոց ցեղասպանության ճանաչման օրենքի նախագծի հեղինակ Դեվիդ Թրոթը.

«Դուք պետք է իմանաք, որ մենք պատրաստ ենք աջակցել ձեզ թե՛ տնտեսական զարգացման և թե՛ քաղաքական ոլորտում: Մենք պատրաստ ենք օգնել Հայաստանի քաղաքացիներին հասնելու իրենց արժանի կյանքի մակարդակին»:

Միացյալ Նահանգներում կարևորում և գնահատում են Հայաստանի դերը, ավելի վաղ հայաստանցի գործընկերների հետ հանդիպման ընթացքում նշել էր Ներկայացուցիչների պալատի արտաքին հարաբերությունների հանձնաժողովի ղեկավար Էդ Ռոյսը.

«Ցանկանում եմ շնորհակալություն հայտնել Հայաստանին բազմաթիվ քրիստոնյա փախստականներին, որոնք Իրաքից, Սիրիայից և Իրանից էին ժամանել, օթեւան տալու համար»:

Իր կողմից Հայաստանն իրեն դիտարկում է որպես Հարավային Կովկասում Միացյալ Նահանգների կանխատեսելի բարեկամ, նշում է «Ելք» դաշինքի ներկայացուցիչ, պատգամավոր Էդմոն Մարուքյանը: Ելույթի ընթացքում նա նաև ներկայացրել է նախագահ Թրամփի «Ամերիկան առաջին տեղում» կարգախոսի սեփական մեկնաբանությունը.

«Հայաստանում մեզ անհրաժեշտ է, որ Ամերիկան առաջին տեղում լինի Հայաստանի տնտեսության մեջ ներդրումների չափով, մեզ անհրաժեշտ է, որ Ամերիկան առաջին տեղում լինի Հայաստանում ժողովրդավարության, մարդու իրավունքների և հիմնարար ազատությունների խորացման գործում»:

ՀՅԴ անդամ Աղվան Վարդանյանի կարծիքով, այս այցով հայ-ամերիկյան հարաբերություններում բացվում է խորհրդարանական դիվանագիտության նոր փուլ.

«Հայաստանն այսօր լուրջ բարեփոխումների շեմին է, և այդ բարեփոխումների ընթացքում կարևոր է, թե որքանով են մեր բարեկամ երկրները մեր կողքին»:

Ամփոփելով այցի առաջին երկու օրերը՝ Արմեն Աշոտյանը նշել է, որ թեև այսօր ամերիկացիներից ոչ շատերը կարող են Հայաստանը գտնել քարտեզի վրա, այնուամենայնիվ, Հայաստանում լավ են գիտակցում Միացյալ Նահանգների գլոբալ դերը.

«Խնդրում եմ, նշեք Հայաստանն Ամերիկայի բարեկամների քարտեզի վրա, որովհետեւ մենք ունենք բազմաթիվ ընդհանրություններ. Ամերիկան առաջին հերթին հզոր է մարդկանց ոգով, Հայաստանը՝ նույնպես: Եվ երկրի կարևորությունը չափվում է ոչ թե տարածքով կամ բնակչությամբ, այլ մարդկանց ոգու հզորությամբ»: