Վրաստանի վարչապետի թեկնածու Մամուկա Բախտաձեն, ելույթ ունենալով խորհրդարանում, հայտարարել է գործարարների՝ մինչև 2013թ․ հարկերի պարտքերը ներելու մտադրության մասին։ Նրա խոսքով՝ այդ նախաձեռնությունը կառնչվի մոտ 36 հազար հարկատուի։
Բացի այդ, Բախտաձեն առաջարկում է ստեղծել նոր մաքսային և հարկային օրենսգիրք՝ մասնավոր սեկտորի մասնակցությամբ։
Երեքշաբթի օրը Վրաստանի խորհրդարանում ելութ են ունեցել նախարարական թեկնածուները, իսկ այսօր պատգամավորները պետք է վստահություն հայտնեն նոր կառավարությանը՝ Մամուկա Բախտաձեի գլխավորությամբ։
Ավելի վաղ Վրաստանի խորհրդարան ներկայացված փաստաթղթից հայտնի է դարձել, որ նոր կառավարությունում լինելու է երեք նոր նախարար՝ էկոնոմիկայի, ֆինանսների ու արտաքին գործերի։
Այսպես՝ էկոնոմիկայի և կայուն զարգացման նախարար Դմիտրի Կումսիշվիլիին կփոխարինի նրա տեղակալ Գեորգի Չերքեզիշվիլին, արտաքին գործերի նախարարի պաշտոնում Միխեիլ Ջանելիձեին կփոխարինի նրա տեղակալ Դավիթ Զալքալիանին, ֆինանսների նախարարի պաշտոնում, որը մինչ այս զբաղեցրել է Բախտաձեն, կնշանակվի նրա տեղակալ Նիկոլոզ Գագուան։
Բախտաձեն նաև հայտարարել է նախարարների քանակը 14-ից մինչև 11 կրճատելու մտադրության մասին։
Անցյալ շաբաթ իշխող «Վրացական երազանք» կուսակցությունը վարչապետի պաշտոնում առաջադրել է Մամուկա Բախտաձեին այն բանից հետո, երբ այդ պաշտոնից հրաժարականի մասին հայտարարել էր Գիորգի Կվիրիկաշվիլին։
